الماتى قالاسى №11 قالالىق ەمحاناسىنىڭ پروفيلاكتيكا جانە الەۋمەتتىك-پسيحولوگيالىق كومەك ءبولىمىنىڭ مەڭگەرۋشىسى ءالونا زەكۋنوۆا سكرينينگتەن ۋاقتىلى ءوتۋدىڭ ماڭىزدىلىعى تۋرالى ايتىپ بەردى.
سكرينينگ – بۇل جاي عانا مەديسينالىق تەكسەرىس ەمەس. بۇل – اۋرۋ بەلگىلەرى ءالى بايقالماي تۇرىپ، ءقاۋىپتى دەرتتەردى ەرتە كەزەڭىندە انىقتاۋعا مۇمكىندىك بەرەتىن شارا.
بۇل تەكسەرۋ 40 پەن 70 جاس ارالىعىنداعى ادامدارعا جۇپ جىلدارى (40، 42، 44، 46، 48، 50، 52، 54، 56، 58، 60، 62، 64، 66، 68، 70) وتكىزىلەدى. باعدارلاما اياسىندا دارىگەرلەر ارتەريالىق گيپەرتونيا، يشەميالىق جۇرەك اۋرۋى، قانت ديابەتى، گلاۋكوما جانە ونكولوگيالىق اۋرۋلاردىڭ بار-جوعىن تەكسەرەدى. سونىمەن قاتار، ءقاۋىپ فاكتورلارى: دەنە سالماعى، ءومىر سالتى، فيزيكالىق بەلسەندىلىك دەڭگەيى، ارتەريالىق قىسىم جانە تاماقتانۋ جاعدايى باعالانادى.
40–70 جاس ارالىعىنداعى ەرلەر مەن ايەلدەر، وفتالمولوگتىڭ ەسەبىندە تۇرماعان جاعدايدا، گلاۋكوماعا ارنايى تەكسەرۋدەن وتەدى. ايەلدەر جاتىر موينى وبىرىنا قارسى سكرينينگتەن 30، 34، 38، 42، 46، 50، 54، 58، 62، 66 جانە 70 جاسىندا وتەدى، سونداي-اق ءسۇت بەزى وبىرىنا قارسى تەكسەرۋ 40 پەن 70 جاس ارالىعىندا، ونكولوگتىڭ باقىلاۋىندا بولماسا دا جۇرگىزىلەدى. ال 50 مەن 70 جاس ارالىعىنداعى ەرلەر مەن ايەلدەرگە، ىشەك اۋرۋلارى جوق جانە ەسەپتە تۇرماعان جاعدايدا، جۇپ جىلدارى كولورەكتالدى قاتەرلى ىسىككە تەكسەرۋ جۇرگىزىلەدى.
سونىمەن قاتار، ۆ جانە س ۆيرۋستىق گەپاتيتتەرىنە قارسى سكرينينگ ءقاۋىپ توبىنا كىرەتىن ادامدار اراسىندا وتكىزىلەدى. ولاردىڭ قاتارىنا: حيرۋرگيا، گينەكولوگيا، ستوماتولوگيا، قان قىزمەتى مەن زەرتحانا قىزمەتكەرلەرى سياقتى مەديسينالىق ماماندار؛ جوسپارلى نەمەسە شۇعىل وپەراسياعا دايىندالىپ جاتقان ناۋقاستار؛ گەمودياليز، گەماتولوگيا، ونكولوگيا جانە ترانسپلانتولوگيا بولىمشەلەرىندە ەم قابىلداپ جاتقان ادامدار؛ قان قۇيعىزاتىن نەمەسە اعزا، ءتىن جانە جاسۋشا ترانسپلانتاسياسىن وتكەرگەن پاسيەنتتەر جاتادى. سونىمەن قاتار، ءاربىر جۇكتى ايەل مىندەتتى تۇردە تەكسەرۋدەن وتەدى، سونداي-اق جۇقتىرۋ ءقاۋپى جوعارى وسال توپ وكىلدەرى دە قامتىلادى.
سكرينينگتەن ۋاقتىلى ءوتۋ – دەنساۋلىقتى ساقتاپ قالۋدىڭ شەشۋشى فاكتورى بولۋى مۇمكىن.
ءوزىڭىزدى كۇتىڭىز جانە ماڭىزدى تەكسەرۋدى كەيىنگە قالدىرماڭىز.
ەسىڭىزدە بولسىن، ەرتە انىقتالعان اۋرۋدى ەمدەۋ جەڭىل بولادى جانە كوبىنەسە ءساتتى اياقتالادى.