«ەڭبەك رەسۋرستارىن دامىتۋ ورتالىعى» اق قازاقستان اۋدارما اكادەمياسىمەن ءونلاين-بىلىم بەرۋدى دامىتۋ سالاسىنداعى ىنتىماقتاستىق تۋرالى مەموراندۋمعا قول قويدى.
ونىڭ اياسىندا Skills Enbek پلاتفورماسىندا اۋدارماشىلاردىڭ بىلىكتىلىگىن ارتتىرۋ ءۇشىن كۋرستار كاتالوگى كەڭەيتىلەدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
قازاقستان اۋدارما اكادەمياسى ورتالىق ازيا اۋماعىندا قوسىمشا كاسىپتىك ءبىلىم بەرۋ جانە بىلىكتى اۋدارماشىلاردى وقىتۋ قىزمەتتەرىن ۇسىنادى. كۋرستاردى تاجىريبەلى وتاندىق جانە شەتەلدىك وقىتۋشىلار مەن اۋدارماشىلار ازىرلەدى.
ونلاين وقىتۋ قازاقستاندىقتارعا بىلىكتىلىگىن ارتتىرۋعا، پراكتيكالىق داعدىلاردى الۋعا جانە جاڭا سالادا ءوز مانسابىن باستاۋعا مۇمكىندىك بەرەدى.
ەستەرىڭىزگە سالا كەتەيىك، Skills Enbek پلاتفورماسى ماركەتپلەيس قاعيداتى بويىنشا كۋرستارعا قولجەتىمدىلىك بەرەتىن حالىقارالىق وقىتۋ الاڭدارىنىڭ قازاقستاندىق بالاماسى بولىپ تابىلادى. پلاتفورمادا كەز كەلگەن ادام وقي الادى جانە وقۋدى اياقتاعاننان كەيىن الىنعان سەرتيفيكاتتار مەن داعدىلار ەلەكتروندىق ەڭبەك بيرجاسىنداعى تۇيىندەمەدە اۆتوماتتى تۇردە كورسەتىلەدى.
Skills Enbek ىسكە قوسىلعاننان بەرى ءارتۇرلى باعىتتار بويىنشا 232 كۋرس ورنالاستىرىلدى، ونىڭ 133ء-ى تەگىن. تىركەلگەن پايدالانۋشىلار سانى 325 مىڭنان استى، ال وقۋدى ءساتتى اياقتاپ، 270 مىڭنان استام ادام سەرتيفيكات الدى. وقۋدى اياقتاعانداردىڭ ىشىندە 62 مىڭ ادام جۇمىسسىز مارتەبەسىنە يە.
جالپى العاندا، قازاقستان اۋدارما اكادەمياسىمەن ىنتىماقتاستىق ورناتۋ ەلىمىزدەگى كاسىبي اۋدارما سالاسىندا مامانداردىڭ جاڭا بۋىنىن دايارلاۋ ءۇشىن قازاقستاندىقتارعا قولجەتىمدى كۋرستاردىڭ بازاسىن كەڭەيتۋگە مۇمكىندىك بەرەدى.