بەسەۋىنىڭ تورتەۋى وزەننەن ءوتىپ ۇلگەرگەن، ال بىرەۋى قالىپ كەتكەن
ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ميانما مەن تايلاندتىڭ اراسىندا ورنالاسقان "التىن ءۇشبۇرىش" دەگەن اۋماقتا قازاقستان ازاماتتارى جۇمىس قۇلدىعىنا ءتۇسىپ، قاشۋعا ءماجبۇر بولعانىن ايتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.
سىرتقى ىستەر مينيسترلىگىنىڭ حابارلاۋىنشا، ميانمادا قۇلدىقتان قاشقان قازاق جىگىتىن ەلگە قايتارۋ ءۇشىن كەلىسسوز جۇرگىزىلىپ جاتىر.
"وسىعان دەيىن قانشا رەت ەسكەرتۋ ايتىپ، اقپارات تاراتساق تا، قازاقستاندىقتار سول جاققا بارىپ جاتىر. كەيىنگى اقپارات بويىنشا ول جاقتان 5 قازاقستان ازاماتى انىقتالدى"، - دەدى ايبەك سمادياروۆ سىم-دە وتكەن بريفينگتە.
ايبەك سمادياروۆتىڭ تۇسىندىرۋىنشە، بيىل ساۋىردە ءبىر ادام قازاقستاننىڭ تايلاندتاعى كونسۋلىنا حابارلاسىپ، 5 قازاقستاندىقتىڭ ميانمادا قۇلدىقتا وتىرعانى تۋرالى ايتقان. ولار ءوز ەركىمەن جۇمىس ىستەۋگە بارعان. وسىنداي جاعدايدا بىرنەشە ادامدى قۇتقارعان كونسۋلدىڭ ءتيىستى تاجىريبەسى بار. ول اتالعان ادامدارعا قۇلدىقتان بوساپ شىعۋ تاسىلىنە قاتىستى كەڭەس بەرگەن. ءبىزدىڭ ازاماتتاردى ۇستاپ وتىرعان كومپانيا قوس ەل شەكاراسىنىڭ ماڭىندا ورنالاسقان.
قازاق جىگىتتەرى سول جەردەگى وزەننەن ءوتىپ، تايلاندقا قاشاتىن بولىپ كەلىسكەن. ءبىراق قاشاتىن كۇنى بۇل تۋرالى جارتى ساعات بۇرىن عانا كونسۋلعا ەسكەرتكەن. ال كونسۋل بانگكوكتان اتالعان شەكاراعا جەتۋ ءۇشىن اۆتوكولىكپەن 7 ساعاتتاي ءجۇرۋى كەرەك.
"قازاقستان ازاماتتارى كومپانيانىڭ اۋماعىنان شىققان بويدا كومپانيا وكىلدەرى ولاردىڭ ىزىنە تۇسكەن. بەسەۋىنىڭ تورتەۋى وزەننەن ءوتىپ ۇلگەرگەن، ال بىرەۋى قالىپ كەتكەن. كومپانيا كۇزەتشىلەرى ونى ۇستاپ الدى"، - دەدى ءسىم وكىلى.
تايلاندقا وتكەن 4 ادامعا قازاقستان كونسۋلى كومەكتەسىپ، ولار بانگكوككە جەتتى. 3-4 كۇندە ولار قازاقستانعا ورالادى. ال ميانمادا قالعان اداممەن ءبىر اپتادان بەرى بايلانىس جوق.
"سول كومپانيانىڭ باسشىلىعىنا جانە كۇزەتشىلەرىنە حابارلاستىق. ولار بىزگە ناقتى جاۋاپ بەرمەدى. قولدا بار اقپاراتقا ساي، ولار ءار ادامعا 6 ملن تەڭگە سۇراعان. ءقازىر كەلىسسوزدى جالعاستىرىپ جاتىرمىز. كومپانيا وكىلدەرى جاۋاپ بەرسە، ول جىگىتتى الىپ شىعۋعا مۇمكىندىك بولادى"، - دەپ تۇيىندەدى ءسوزىن ايبەك سمادياروۆ.