عىلىم جانە جوعارى ءبىلىم مينيسترلىگىنىڭ مالىمەتىنشە، وتاندىق عالىم سيكورييدىڭ ديابەتكە قارسى ءتيىمدى اسەرىن انىقتادى، دەپ حابارلايدى aqshamnews.kz
ءال-فارابي اتىنداعى قازاق ۇلتتىق ۋنيۆەرسيتەتىنىڭ اعا وقىتۋشىسى، جاس عالىم ايجامال بايسەيىتوۆا سيكوريي وسىمدىگىنىڭ قاسيەتىن جان-جاقتى زەرتتەپ، ونىڭ ديابەتكە قارسى ءتيىمدى اسەرى بار ەكەنىن عىلىمي تۇرعىدا دالەلدەگەن.
زەرتتەۋ بارىسىندا سيكوريي قۇرامىنداعى بيولوگيالىق بەلسەندى زاتتاردىڭ قانداعى قانت دەڭگەيىن تومەندەتۋگە، سونداي-اق زات الماسۋ پروسەسىن رەتتەۋگە وڭ ىقپال ەتەتىنى انىقتالعان.
سونىمەن قاتار ادام اعزاسىندا سترەسس اسەرىنەن پايدا بولاتىن راديكالدارعا قارسى انتيوكسيدانتتىق بەلسەندىلىگى دا بار ەكەنى بەلگىلى بولعان. بۇل وسىمدىكتىڭ دەنساۋلىقتى نىعايتۋداعى الەۋەتى جوعارى ەكەنىن كورسەتەدى.
عالىمنىڭ ايتۋىنشا، قازىرگى تاڭدا اتالعان عىلىمي جوبا اياسىندا حالىقارالىق عىلىمي جۋرنالداردا ەكى ماقالا جاريالانعان.
"ءبىزدىڭ ماقساتىمىز – ەمدىك قاسيەتى بار وسىمدىكتەر ارقىلى ادام اعزاسىندا ءجيى كەزدەسەتىن اۋرۋلارعا قارسى بيولوگيالىق بەلسەندى قوسپالار ازىرلەۋ. قازىرگى ۋاقىتتا سيكوريي وسىمدىگىنىڭ فيتوحيميالىق جانە فارماكولوگيالىق قاسيەتتەرىن زەرتتەپ جاتىرمىز. بۇگىنگە دەيىن ونىڭ ديابەتكە جانە سترەسكە قارسى بەلسەندىلىگى انىقتالدى. الداعى ۋاقىتتا ۆيرۋستار مەن باكتەريالارعا، سونىڭ ىشىندە تۇماۋ اۋرۋىنا قارسى اسەرىن زەرتتەۋدى جوسپارلاپ وتىرمىز"، - دەدى ايجامال بايسەيىتوۆا.
ايجامال بايسەيىتوۆا ءال-فارابي اتىنداعى قازۇۋ-دىڭ حيميا جانە حيميالىق تەحنولوگيا فاكۋلتەتىندە ءدارىس بەرەدى. سونىمەن قاتار ۋنيۆەرسيتەت جانىنداعى دارىلىك وسىمدىكتەردى عىلىمي-زەرتتەۋ ورتالىعىندا قىزمەت اتقارادى. ول وڭتۇستىك كورەياداعى كونسان ۇلتتىق ۋنيۆەرسيتەتىندە ماگيستراتۋرا مەن دوكتورانتۋرادا ءبىلىم الىپ، دوكتورلىق دارەجەسىن ءساتتى قورعاعان.