سيفرلىق ءتولقۇجات پەن Volu-Coins: الماتىدا ەرىكتىلىكتىڭ گەيميفيكاسيالانعان مودەلى ەنگىزىلەدى

الماتىدا 2026 جىلى گەيميفيكاسيا ەلەمەنتتەرى بار ەرىكتى رەتىندە قاتىسۋدىڭ سيفرلىق مودەلىن ەنگىزۋ جوسپارلانىپ وتىر. بۇل تۋرالى الماتى قالالىق وڭىرلىك كوممۋنيكاسيالار قىزمەتىندە وتكەن بريفينگتە قالالىق جاستار ساياساتى باسقارماسى باسشىسى ازيز كاجدانبەك مالىمدەدى.

ونىڭ ايتۋىنشا، تۇراقتى ەرىكتىلەر ينفراقۇرىلىمىن دامىتۋعا جانە زاماناۋي سيفرلىق شەشىمدەردى ەنگىزۋگە ەرەكشە نازار اۋدارىلادى. بۇگىندە الماتىداعى ەرىكتىلەردىڭ فرونت كەڭسەسى 58 مىڭنان استام ەرىكتىنى بىرىكتىرەدى. تەك 2025 جىلدىڭ وزىندە ولار قالاداعى 2 مىڭنان اسا ءىس-شاراعا قولداۋ كورسەتكەن. بۇل ەرىكتىلەر قوزعالىسىنىڭ جۇيەلىلىگى مەن اۋقىمىن ايقىن اڭعارتادى.

«ءبىزدىڭ باستى مىندەتىمىز – ەرىكتىلىك جاستار ءۇشىن ءبىر رەتتىك اكسيا ەمەس، جەكە دامۋدىڭ جانە قالا ومىرىنە ارالاسۋدىڭ تۇسىنىكتى ءارى اشىق جولىنا اينالۋىنا جاعداي جاساۋ»، – دەدى ازيز كاجدانبەك.

سيفرلىق مودەل اياسىندا ءاربىر قاتىسۋشىعا ونىڭ مارتەبەسى، جەكە ستاتيستيكاسى، ميسسيالارى مەن جەتىستىكتەرى كورىنىس تاباتىن سيفرلىق ەرىكتىلىك ءتولقۇجاتى جاسالادى. سونداي-اق، Volu-Coins اتتى ىشكى ىنتالاندىرۋ ۆاليۋتاسىن ەنگىزۋ كوزدەلگەن. ونى جابىق ءىس-شارالارعا قاتىسۋعا، برەندتىك ونىمدەر الۋعا جانە قوعام كوشباسشىلارىمەن كەزدەسۋلەرگە پايدالانۋعا بولادى.

ۇزدىك ەرىكتىلەر قالالىق رەيتينگكە ەنگىزىلىپ، ستراتەگيالىق جوبالارعا تارتىلادى. ارنايى ۆيزۋالدى سيفرلىق كارتا ەرىكتىلىك جولدى جانە قالالىق باستامالارعا قاتىسۋ دەڭگەيىن كورنەكى تۇردە باقىلاۋعا مۇمكىندىك بەرەدى.

بۇعان قوسا، 2026 جىلى الماتىدا «Almaty Volunteers 2026» لەندينگىن ىسكە قوسۋ، جاستار الاڭدارىندا ەكوسۇرىپتاۋ پۋنكتتەرىن اشۋ، ەرىكتىلەر اكادەمياسىنىڭ جۇمىسى، جازعى كوشباسشىلىق لاگەرىن وتكىزۋ، سونداي-اق Volunteer Skills Map سيفرلىق كارتاسىن ەنگىزۋ جوسپارلانعان. سونىمەن قاتار ەرىكتىلىك ورتالىقتاردىڭ جۇمىسىن بىرىزدەندىرەتىن ورتاق ستاندارتتار، ۆەريفيكاسيا تەتىكتەرى جانە ەرىكتىلەر مارتەبەسىن دامىتۋعا ارنالعان ۇسىنىستار ازىرلەنىپ جاتىر.