مەملەكەت باسشىسى قاسىم-جومارت توقايەۆتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن جانە وزگە دە تاپسىرمالارىن جۇزەگە اسىرۋ اياسىندا قۇقىق قورعاۋ سالاسىندا زاماناۋي سيفرلىق تەحنولوگيالاردى كەڭىنەن ەنگىزۋ قولعا الىنۋدا. بۇل – قىلمىستىڭ الدىن الۋ مەن ازاماتتاردىڭ قاۋىپسىزدىگىن قامتاماسىز ەتۋدىڭ باستى تەتىگى.
قازىرگى تاڭدا ەلىمىز بويىنشا 19 مىڭنان استام بەينەباقىلاۋ كامەراسى جاساندى ينتەللەكت تەحنولوگيالارىمەن جابدىقتالعان. ولار ادامنىڭ بەت-الپەتىن تانۋعا، زاتتاردى تالداۋعا جانە كولىك اعىندارىن باقىلاۋعا قابىلەتتى. جۇيەلەر جەدەل باسقارۋ ورتالىقتارىمەن ينتەگراسيالانعاندىقتان، وقيعالارعا ناقتى ۋاقىت رەجيمىندە جەدەل ارەكەت ەتۋگە مۇمكىندىك بەرەدى.
پوليسيا قىزمەتكەرلەرى دە جاڭا تەحنيكالىق قۇرالدارمەن قامتىلۋدا: زاماناۋي پلانشەتتەر، سمارت-جەتوندار مەن بايلانىس جۇيەلەرى ءتارتىپ ساقشىلارىنىڭ ۇتقىرلىعىن جانە جۇمىسىنىڭ تيىمدىلىگىن ارتتىردى.
ازاماتتار ءۇشىن ىڭعايلى «102» ءموبيلدى قوسىمشاسى، سونداي-اق eGovMobile جانە ەكىنشى دەڭگەيدەگى بانكتەردىڭ قوسىمشاسىنا ەنگىزىلگەن «زاڭ جانە ءتارتىپ» سەرۆيسى ارقىلى كەز كەلگەن قۇقىق بۇزۋشىلىق تۋرالى ءبىر باتىرمانى باسۋ ارقىلى حابارلاۋعا بولادى. بۇل قوعام مەن قۇقىق قورعاۋ ورگاندارى اراسىنداعى بايلانىستى نىعايتىپ، سەنىم دەڭگەيىن ارتتىرادى.
سونىمەن بىرگە، سيفرلىق شەشىمدەردىڭ كومەگىمەن الاياقتىققا قارسى كۇرەس كۇشەيتىلدى. ماسەلەن، الاياقتاردىڭ ازاماتتاردىڭ ەسەپ-شوتتارىنان 2،2 ملرد تەڭگە كولەمىندەگى قاراجاتتى ۇرلاۋ ارەكەتىنىڭ جولى كەسىلدى. قارجى نارىعىنداعى قۇقىقتىق جانە سيفرلىق ساۋاتتىلىقتى ارتتىرۋعا باعىتتالعان ءتۇسىندىرۋ جۇمىستارى دا جۇيەلى تۇردە جۇرگىزىلۋدە.
ەرجان سادەنوۆ اتاپ وتكەندەي:
«سيفرلىق تەحنولوگيالار تەك قاۋىپسىزدىكتى قامتاماسىز ەتۋدە عانا ەمەس، حالىقتىڭ قۇقىقتىق مادەنيەتىن كوتەرۋدە دە ماڭىزدى ءرول اتقارىپ وتىر. بۇل – قازاقستاندى قۇقىقتىق ءارى ادىلەتتى مەملەكەت رەتىندە نىعايتۋدىڭ جاڭا قادامى».