بۋرابايدا «ۇلتتىق قۇرىلتاي» ءوتىپ جاتىر. كەشە ءھام بۇگىن. ءتۇرلى تاقىرىپ، سان ءتۇرلى ۇسىنىس، سان قىرلى بايانداما ايتىلۋدا. قوعام بەلسەندىلەرى، زاڭگەرلەر، دەپۋتاتتار جانە باسقالارى قاتىسۋدا. پرەزيدەنت تە جيىندا ءسوز سويلەپ، بايانداما جاسادى. جالپى قۇرىلتايدى ەكىگە ءبولىپ قاراستىرسا بولادى دەپ ويلايمىن. ءبىرىنشىسى يدەولوگيا، رۋحانيات، مادەنيەتكە قاتىستى تاقىرىپتار ايتىلادى، ەكىنشىسى ەكونوميكا، الەۋمەتتىك ماسەلە جانە باسقا قامتىلادى. پرەزيدەنت ءوز بايانداماسىن سول رۋحاني ماسەلەدەن باستادى دا، الەۋمەتتىك-ەكونوميكالىق ماسەلەلەرگە قاتىستى پىكىرىن ءبىلدىردى، ۇسىنىستارىن ايتتى. جالپى الداعى جىلدارعا باعىتتالعان ءبىرشاما باستامالاردى ىسكە اسىرۋ جايلى ايتىلدى.
قازاقستاننىڭ تۇراقتى دامۋىن قامتاماسىز ەتەتىن 4 ستراتەگيالىق نەگىزگى باعىتقا كەڭىنەن توقتالدى. ولار: سيفرلاندىرۋ مەن جاساندى ينتەللەكت، ەنەرگەتيكا، اگروونەركاسىپتىك كەشەن مەن ادام كاپيتالى.
بۇل جاعى تۇسىنىكتى دەپ ويلايمىن. سيفرلاندىرۋ مەن جاساندى ينتەللەكت الەمدى وزگەرتىپ جاتىر عوي. بىزدە سيفرلاندىرۋ جاقسى دەڭگەيدە دامۋدا. ەلەكتروندى ۇكىمەت تە الداعى وتىزدىقتا. ەندى بىزگە جاساندى ينتەللەكت سالاسىنا ەرەكشە كوڭىل ءبولۋ كەرەك. سەبەبى ەكونوميكانىڭ دامۋىنا تىكەلەي اسەرىن تيگىزەدى. ءقازىر الەمدە اۋىل شارۋاشىلىعىنان باستاپ عارىشقا دەيىنگى تەحنولوگيانى جي ارقىلى جاساۋ، باسقارۋ جوسپارلانىپ جاتىر. ءجي-دى جان-جاقتى مەڭگەرگەن مەملەكەتتەر كوپ ماسەلەنى جىلدام شەشە الادى. جي دامىعان ەلدەردىڭ ءجىو دە تۇراقتى نەگىزدە وسەدى دەگەن بولجام ايتىلىپ ءجۇر. سول سەبەپتى دە مەملەكەت وسى سالاعا باسىمدىق بەرۋ كەرەك. «سكاينەت» دەپ ۇركىپ جۇرگەندەر دە بار ەكەن) الايدا سكاينەتتەن ەمەس، كەرىسىنشە وسى سالادا كوش سوڭىندا قالۋدان سەسكەنگەنىمىز ءجون بولار.
ەنەرگەتيكالىق الەۋەتتى ارتتىرۋ دەگەن وتە ماڭىزدى ارينە. ەنەرگەتيكا دەگەنىمىز تەك مۇناي مەن گاز ءوندىرۋ، كومىر جاعۋ عانا ەمەس، جالپى ءتۇرلى ەنەرگيانى دامىتۋ عوي. جەل، كۇن، يادرولىق ەنەرگەتيكا سالاسى دەگەندەي. جالپى ينۆەستورلار قانداي دا ءبىر ەلگە كەلگەن ساتتە، «ەنەرگيانىڭ تاپشىلىعى جوق پا» دەگەن سۇراقتى قويادى. كەلگەن ينۆەستور ەنەرگيانىڭ جەتكىلىكتى بولۋىن قالايتىنى تۇسىنىكتى. سالعان قارجىسى اقتالۋىن قالايدى، ول ءۇشىن زاۋىت، ونەركاسىپ كەشەنى جانە باسقادا تۇراقتى ەنەرگيا بولۋ قاجەت دەگەندەي. جالپى الەمدە ەنەرگيانىڭ سوڭىنان قۋۋ كەزەڭى باستالدى دەيدى ماماندار. حالىق سانى ءبىر عاسىردا 2 ملردتان 8 ملردقا جەتتى. ەنەرگيانى تۇتىنۋشىلار سانى ارتۋدا. بىزدە دە حالىقتىڭ سانى اقىرىنداپ ارتىپ كەلەدى. دەمەك ەنەرگيانى تۇتىنۋ دا ارتا تۇسۋدە. بۇل ءبىر عانا فاكتور.
اگروونەركاسىپ سالاسىن دامىتۋ ارقىلى ەكونوميكانى ءارتاراپتاندىرۋدى جىلدامداتۋعا بولادى. ءقازىر ىشكى نارىقتى ءبىرشاما قامتىپ وتىرمىز-اۋ، الايدا گەوگرافيالىق مۇمكىندىگىمىزگە قاراي سىرتقى نارىققا دا بەلسەندى شىعۋدى قاراستىرۋ قاجەت. البەتتە، ول ءۇشىن بۇل سالانى قولداۋدى ارتتىرۋ جانە ولقىلىقتاردى جويۋ ماڭىزدى.
جوعارىدا ايتىلعان ۇشەۋدىڭ دە ساپالى ىسكە اسۋى ادام كاپيتالىنا تىكەلەي بايلانىستى. ءبىلىمدى، العىر، دەنى ساۋ ءارى كاسىبي مامانداردىڭ سانىن ارتتىرۋ ارقىلى عانا وڭ ناتيجەگە تەز قول جەتكىزۋگە بولادى.
جالپى بۇگىن جاقسى ۇسىنىستار ايتىلدى. ءبىرشاما ساندار دا كەلتىرىلدى. سالىناتىن مەكتەپ، سوعىلاتىن مەديسينالىق كەشەندەر، جوندەلەتىن جولدارعا دا توقتالىپ ءوتتى.
مىناعان توقتالا سالايىنشى. تەرىس ءدىني اعىمدار جايلى ءبىر ەمەس، ەكى مارتە ايتىلىپ قالدى.
«ۇلتتىق كيىم كيۋ بىرتىندەپ قالىپتى كورىنىسكە اينالىپ كەلەدى. بۇل – وتە جاقسى ءۇردىس. بەت-جۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق» دەدى ءبىر سوزىندە.
ەكىنشى ءبىر سوزىندە: «تەرىس اعىمدارعا، قازاقتىڭ بولمىسىنا جات يدەولوگيالارعا توسقاۋىل قويۋ قاجەت ەكەنىنە ەش كۇمان جوق. ەلىمىزدە ءدىن بوستاندىعىنا كەپىلدىك بەرىلگەن. ءبىراق جۇگەنسىزدىككە، تارتىپسىزدىككە جول بەرۋگە بولمايدى. ءدىننىڭ اسا ماڭىزدى ميسسياسى – ۇلتتى ۇيىستىرۋ. ءدىني ۇيىمداردىڭ قىزمەتىن رەتتەيتىن قۇجاتتار وسى تالاپقا ساي بولۋعا ءتيىس. بۇل ماسەلەنى جان-جاقتى قاراۋ كەرەك. سونىڭ ىشىندە زاڭنامانى جاڭا جاعدايعا بەيىمدەپ وتىرۋ وتە ماڭىزدى» - دەيدى پرەزيدەنت.
جات اعىمدار بويىنشا، تەرىس اعىمدار بويىنشا زاڭدى قاتاڭداتۋ كەرەكتىگى ايتىلىپ كەلە جاتقانىنا ءبىراز بولدى عوي. دەسترۋكتيۆتى ءدىني اعىمداردى قاتاڭ زاڭمەن عانا توقتاتۋعا بولادى. قۇرىلتايدا كوتەرىلگەن ماسەلەلەردىڭ كەيىن زاڭعا اينالىپ جاتقانىن كوردىك. تۋرا وسى تەرىس ءدىني اعىممەن كۇرەس تۋرالى ۇسىنىس زاڭعا اينالار دەپ ۇمىتتەنەمىن.