شىرشانىڭ باعاسى قىمباتتادى

ءقازىر الماتىدا شىرشا ساۋداسى قىزىپ تۇر.

ساۋداگەرلەر جەلتوقساننىڭ سوڭعى كۇندەرىندە شىرشاعا سۇرانىس تىپتەن ارتاتىنىن ايتادى، سوعان وراي بيىل باعاسى دا كوتەرىلىپتى، دەپ حابارلايدى Almaty-akshamy.kz

«بيىل شىرشا باعاسى وتكەن جىلمەن سالىستىرعاندا 20-30 پايىزعا قىمباتتادى. ادامدار نەگىزىنەن جاساندى شىرشانى تاڭدايدى. ويتكەنى ونى جىلدا قولدانۋعا بولادى. ءقازىر جاساندى شىرشانىڭ الۋان ءتۇرى بار. اق، جاسىل، ويىنشىق ىلىنگەن، توبەسىن قار باسقان شىرشالار دا بار. جاساندى شىرشانىڭ باعاسى 5 مىڭ تەڭگەدەن باستالادى»، - دەيدى ساتۋشى جانسەرىك تاعاباي.

ساتۋشىلار جىلدان-جىلعا تابيعي شىرشانى قولدانۋشىلاردىڭ قاتارى ازايىپ كەلە جاتقانىن ايتادى.

«قۋانارلىعى، جىلدان-جىلعا تابيعي شىرشانى قولدانۋشىلاردىڭ قاتارى ازايىپ بارادى. ال جاساندى شىرشانىڭ باعاسى قولدانىلعان ماتەريالعا بايلانىستى. نەگىزى ەۋروپادان جەتكىزىلگەن شىرشا قىمبات. ال جۇڭگو شىرشاسى ارزان بولادى»،- دەدى ساتۋشى.

الماتىداعى سۋپەرماركەتتەر مەن دۇكەندەردە جاساندى شىرشالاردىڭ باعاسى بازارمەن سالىستىرعاندا الدەقايدا قىمبات. مىسالى، بيىكتىگى 180 سم جاساندى شىرشا 18-20 مىڭ تەڭگە كولەمىندە. ەكى مەترلىك شىرشا 30 مىڭ تەڭگە جانە ودان جوعارى. باقتا وسكەن، ءيىسى اڭقىپ تۇرعان سۇلۋ شىرشانىڭ باعاسى 35 مىڭ تەڭگەدەن باستالادى.

«ساتۋعا ارنالعان تابيعي شىرشانى كوبى جەكە ءتالىمباقتا وسىرەدى. كەيبىرەۋلەرى رەسەي، قىرعىزستان، جۇڭگو سياقتى باسقا ەلدەردەن اكەلەدى. دەگەنمەن، ساتۋشىلاردىڭ ءتىرى شىرشالاردى ساتۋعا رۇقساتى بولۋى كەرەك. بيىلعى جىلى رەيد بارىسىندا زاڭسىز اعاش كەسۋ نەمەسە ساتۋ فاكتىلەرى تىركەلگەن جوق. شىرشانى زاڭسىز كەسكەندەر قىلمىستىق جانە اكىمشىلىك جاۋاپكەرشىلىككە تارتىلادى»، - دەپ جاۋاپ بەردى الماتى قالاسى تابيعاتتى قورعاۋ پوليسياسىنىڭ باستىعى نۇرلان قارپىقوۆ.