قالادا كەنە شاعىپ مەديسينالىق كومەككە قارالعان 284 ادام تىركەلدى
16 مامىر كۇنى شىمكەنت قالاسىندا 1 «كقگق ىقتيمال جاعدايى» تىركەلدى. بۇل تۋرالى سانيتاريالىق - ەپيدەميولوگيالىق باقىلاۋ كوميتەتى مالىمدەدى، دەپ حابارلايدى Almaty-akshamy.kz.
تۇركىستان وبلىسى، بايدىبەك اۋدانىنىڭ 46 جاستاعى تۇرعىنى «اسقازان-ىشەك جولدارىنان قان كەتۋ. وتكىر اۋىر اعىمى» دياگنوزىمەن وبلىستىق كلينيكالىق اۋرۋحاناعا جەدەل جاردەم كولىگىمەن جۇگىنگەن. وسى كۇنى ناۋقاس «كقگق ىقتيمال جاعداي» دياگنوزىمەن شىمكەنت قالاسىنىڭ جۇقپالى اۋرۋلار اۋرۋحاناسىنا اۋىستىرىلدى.
بۇگىنگى كۇنگە ناۋقاستىڭ جالپى جاعدايى ينتوكسيكاسيا مەن گەمورراگيالىق سيندرومعا بايلانىستى اۋىر دارەجەدە. ناۋقاس وقشاۋلانىپ، شىمكەنت قالالىق جۇقپالى اۋرۋلار اۋرۋحاناسىنا جانساقتاۋ بولىمشەسىنە جاتقىزىلدى.
ناۋقاسپەن قارىم-قاتىناستا بولعان 15 ادام انىقتالدى، ونىڭ ىشىندە 9 ادام - مەديسينالىق قىزمەتكەرلەر، بارلىعى مەديسينالىق باقىلاۋعا الىندى. ىندەتتىڭ الدىن الۋ ماقساتىندا كەشەندى ەپيدەميولوگيالىق، زووپارازيتولوگيالىق جانە ۆەتەرينارلىق الدىن الۋ ءىس شارالارى ءتيىستى ماماندارمەن جالعاسۋدا.
شىمكەنت قالاسى كونگو-قىرىم گەمورراگيالىق قىزباسى اۋرۋىنان قولايسىز ايماقتار قاتارىنا جاتادى. وتكەن جىلى كقگق-نىڭ 2 جاعدايى تىركەلگەن.
قالادا كەنە شاعىپ مەديسينالىق كومەككە قارالعان 284 ادام تىركەلدى (2021 جىلدىڭ اعىمداعى مەرزىمىندە – 94 ادام)، ياعني وتكەن جىلدىڭ وسى مەرزىمىمىن سالىستىرعاندا كەنە شاعۋ جاعدايى 3 ەسەگە وسكەن.
وسى رەتتە، شىمكەنت قالاسىندا كەنەلەردىڭ كوبەيۋىنىڭ جانە ادامدار اراسىندا كقگق اۋرۋىنىڭ تىركەلۋىنىڭ الدىن الۋ ماقساتىندا كەنەگە قارسى زالالسىزداندىرۋ جۇمىستارى جالعاسىپ جاتقانىن ەسكە سالامىز.
كقگق اۋرۋىنىڭ الدىن الۋ ماقساتىندا شىمكەنت قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ جانە ونىڭ اۋماقتىق باسقارمالارىنىڭ ماماندارىمەن تۇراقتى تۇردە سانيتاريالىق-اعارتاۋ جانە ءتۇسىندىرۋ جۇمىستارى جۇرگىزىلۋدە.
كونگو-قىرىم گەمورراگيالىق قىزباسى – بۇل ۆيرۋس قوزدىرعىشىنان تۋىندايتىن اسا ءقاۋىپتى جۇقپالى اۋرۋ، ناۋقاس دەر كەزىندە مەديسينالىق كومەككە جۇگىنبەگەن جاعدايدا، ءولىم جاعدايىنا اكەلىپ سوقتىرۋى مۇمكىن.
كونگو-قىرىم گەمورراگيالىق قىزباسى اۋرۋىنىڭ نەگىزگى كلينيكالىق كورىنىستەرى: ينكۋباسيالىق كەزەڭ (اۋرۋ قوزدىرعىشىن جۇقتىرعاننان اۋرۋدىڭ العاشقى بەلگىلەرىنىڭ پايدا بولۋىنا دەيىنگى مەرزىم) 1-14 كۇنگە دەيىن سوزىلادى، بۇل كەزەڭنىڭ ۇزاقتىعى ۆيرۋستى جۇقتىرۋ جولىنا بايلانىستى بولادى.
اۋرۋدىڭ العاشقى بەلگىلەرى: دەنە قىزۋىنىڭ كەنەتتەن 39-40ᵒس-قا دەيىن كوتەرىلۋى؛ قاتتى باس اۋىرۋى؛ كوزدىڭ قىزارۋى؛ بەت، مويىن جانە دەنەنىڭ جوعارعى بولىگىنىڭ قىزارىپ، ىسىنۋىمەن جانە مويىن، ارقا، بەلدىڭ اۋىرۋىمەن؛ لوقسۋ نەمەسە قۇسۋ؛ ءىش اۋىرۋى نەمەسە ءوتۋى؛ اۋرۋ ودان ءارى دامىعان جاعدايدا: دەنەدە بورتپەلەردىڭ پايدا بولۋى؛ مۇرىننان، قىزىل يەكتەن، جاتىردان، اسقازاننان قان كەتۋ بەلگىلەرى؛ ينە ەنگىزۋ ورىندارىندا قانتالاۋ (گەماتومالار) بەلگىلەرىنىڭ بايقالۋىمەن سيپاتتالادى.
كونگو-قىرىم گەمورراگيالىق قىزباسى قالاي جۇعادى؟
نەگىزگى جۇقتىرۋشى جانە اۋرۋ قوزدىرعىشتارىن تاسىمالداۋشى كەنە بولىپ تابىلادى. ادامنىڭ اۋرۋدى جۇقتىرۋى جۇقپالانعان كەنەمەن قاتىناستا نەمەسە كەنە شاققان جاعدايلاردا، كونگو-قىرىم گەمورراگيالىق قىزباسى اۋرۋىمەن اۋىرىپ جاتقان ناۋقاس ادامعا كۇتىم جاساۋ كەزىندە ناۋقاستىڭ قانى جانە اعزا بولىندىلەرى، سۇيىقتىقتارى ارقىلى جانە كقگق قوزدىرعىشىمەن زالالدانعان مەديسينالىق قۇرالدارمەن جاناما بايلانىس ارقىلى جۇعۋى مۇمكىن.
كونگو-قىرىم گەمورراگيالىق قىزباسى اۋرۋىنىڭ الدىن-الۋ:
- تابيعي وشاق اۋماعىندا ورنالاسقان ەلدى مەكەندەردەگى جانۋارلاردى، قورا-جايلار مەن ءۇي جايلارىنىڭ اۋماعىن كەنەگە قارسى زالالسىزداندىرۋ؛
- تابيعي وشاقتاردا ورنالاسقان تۇرعىندار مالداردى كۇتىپ قاراعاندا، قىرقىم كەزىندە كەنەلەردىڭ شابۋىلىنان ساقتانۋ جانە كەنە قانىمەن جاناستى بولدىرماۋ ماقساتىندا جەكە قورعانۋ ءۇشىن ارنايى كيىم كيۋ قاجەت (قالپاقتى كومبينەزون، شالباردىڭ بالاعىن شۇلىقتىڭ ىشىنە سالۋ، جاقسى قورعالعان اياق جانە باس كيىم، رەزىڭكە قولعاپ)؛
- تابيعاتقا دەمالىسقا شىققاندا كەنەنىڭ جابىسقانى كورىنەتىن اشىق ءتۇستى، جاقسى قورعالعان، رەزەڭكەلى مانجەتتى جەڭى ۇزىن كويلەك كيۋ قاجەت. دەنەگە كەنەنىڭ جابىسقانىن تەكسەرۋ ءۇشىن وزىڭىزگە بايقالمايتىن ورىنداردى (مويىن، باستىڭ شاش بولىگى، دەنەنىڭ ارتقى جاعى، ت.ب.)، ءبىر-بىرىڭىزدىڭ ۇستەرىڭىزدى مۇقيات قاراپ وتىرۋ قاجەت. دەنەنىڭ اشىق جەرلەرىنە جانە كيىمگە كەنەلەردىڭ شابۋىلىنان قورعايتىن نەمەسە ونى ولتىرەتىن ارنايى ساقتانۋ قۇرالدارىن قولدانۋ قاجەت؛
- كەنە شاققاندا نەمەسە كەنەمەن جاناستا بولۋ ارقىلى اسا ءقاۋىپتى ينفەكسيانى جۇقتىرۋ مۇمكىن بولعاندىقتان، ءوزىڭىزدى جانە ءوز جانۇياڭىزدى قورعاۋ ءۇشىن مىندەتتى تۇردە جەكە باستى قورعاۋ، ساقتانۋ قۇرالدارىن پايدالانىڭىز!
كەنە شاققان نەمەسە كەنەمەن جاناستا بولعان جاعدايلاردا مىندەتتى تۇردە مەديسينالىق ۇيىمعا قارالۋىڭىز جانە 14 كۇن مەديسينالىق باقىلاۋدا بولۋىڭىز قاجەت.