مينيسترلىك وليمپياداعا قاتىسۋشىلاردىڭ ۋلانۋ جاعدايىنا تۇسىنىك بەردى.
وقۋ-اعارتۋ مينيسترلىگىنىڭ باسپا ءسوز قىزمەتى شىمكەنتتە ءوتىپ جاتقان رەسپۋبليكالىق وليمپيادا كەزىندە وقۋشىلاردىڭ استان جاپپاي ۋلانۋىنا قاتىستى تۇسىنىك بەردى، دەپ حابارلايدى اlmaty-akshamy.kz.
وسى كۇندەرى شىمكەنت قالاسىندا جاراتىلىستانۋ-ماتەماتيكا پاندەرى بويىنشا رەسپۋبليكالىق وليمپيادا ءوتىپ جاتىر.
بالالاردىڭ استان ۋلانىپ قالعانى جونىندە الەۋمەتتىك جەلىلەردە جازىلۋدا. شاعىمدارعا «دارىن» رەسپۋبليكالىق عىلىمي-پراكتيكالىق ورتالىعى دا، وقۋ-اعارتۋ مينيسترلىگى دە جاۋاپ بەردى.
«21 ناۋرىز كۇنى وليمپيادانىڭ 904 قاتىسۋشىسىنىڭ 12-سىندە دەنە قىزۋىنىڭ كوتەرىلۋى، اسقازان-ىشەك جولدارى قىزمەتىنىڭ بۇزىلۋى تۇرىندە سىرقات بەلگىلەرى پايدا بولدى. شاقىرىلعان جەدەل جاردەمنىڭ مەديسينا ماماندارى قاراپ شىققاننان كەيىن بالالاردى شىمكەنت قالاسىنىڭ ينفەكسيالىق اۋرۋحاناسىنا جەتكىزۋ شەشىمى قابىلداندى.
قازىرگى ۋاقىتتا بالالاردىڭ جاعدايى تۇراقتالدى. شىمكەنت قالاسىنىڭ سانيتارلىق-باقىلاۋ قىزمەتى بولعان وقيعانىڭ سەبەبىن انىقتاۋ شارالارىن جۇرگىزىپ جاتىر. بالالار مەديسينا ماماندارىنىڭ باقىلاۋىندا. وليمپيادانىڭ ۇيىمداستىرۋ كوميتەتى اتالعان قاتىسۋشىلارعا پسيحولوگيالىق كومەك كورسەتۋدە»، - دەلىنگەن «دارىن» ورتالىعىنىڭ رەسمي مالىمەتىندە.
اتاپ وتىلگەندەي، وليمپيادانىڭ ەكىنشى كەزەڭى بەلگىلەنگەن ۋاقىتتا باستالعان. اۋرۋحانادا جاتقان 12 وقۋشى وعان قاتىسا المادى.
«دەگەنمەن دە، وقۋشىلاردىڭ وليمپادانىڭ قورىتىندى كەزەڭىنە جولداما الۋى تاڭداعان ءپانى بويىنشا ولاردىڭ جوعارى دايىندىعىن كورسەتىپ وتىر. وليمپيادانى ۇيىمداستىرۋ كوميتەتى جەڭىسكە دەگەن جىگەرى ءۇشىن بالالارعا العىس ايتادى جانە وليمپيادا ناتيجەسى بويىنشا ولار ىنتىلاندىرىلاتىن بولادى»، - دەدى ورتالىقتان.
ال مينيسترلىكتىڭ مالىمەتىنە سۇيەنسەك، وقيعانىڭ ءمان-جايىن انىقتاۋ ءۇشىن شىمكەنتكە ۆيسە-مينيستر باستاعان دەلەگاسيا اتتانىپ كەتتى.
«وقۋ-اعارتۋ ءمينيسترىنىڭ تاپسىرماسىمەن ۆيسە-مينيستر شولپان كارينوۆا، ورتا ءبىلىم بەرۋ كوميتەتى ءتوراعاسىنىڭ ورىنباسارى، بالالار قۇقىعىن قورعاۋ كوميتەتىنىڭ ءتوراعاسى باستاعان جۇمىس توبى سول جەرگە اتتانىپ كەتتى. جۇمىس توبى ءاربىر ماسەلەنى مۇقيات تەكسەرەتىن بولادى. جاعداي وقۋ-اعارتۋ مينيسترلىگىنىڭ جەكە باقىلاۋىندا»، - دەپ جازدى ءمينيستردىڭ باسپا ءسوز حاتشىسى مەرەكە نۇرمۇحانوۆا.