ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن
الماتى قالاسىنىڭ توتەنشە جاعدايلار دەپارتامەنتى تاۋدا اباي بولۋعا شاقىردى، دەپ حابارلايدى Almaty-akshamy.kz.
الماتى قالاسى توتەنشە جاعدايلار دەپارتامەنتى تاراتقان مالىمەتكە سايكەس، قار كوشكىنى قاۋپىنە بايلانىستى قاۋىپسىزدىكتى قامتاماسىز ەتۋ ماقساتىندا قازىرگى ۋاقىتتا ۇلكەن الماتى كولى مەن شىمبۇلاققا باراتىن جولدار جابىلىپ، بەكەتتەر قويىلدى.
30 قاراشا كۇنى جىلىمىقتىن اسەرىنەن جانە قار جامىلعىسىنىڭ تۇراقسىز بولۋىنا بايلانىستى ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن.
قۇتقارۋشىلار تۇرعىنداردى قار كوشكىنىن تۋدىرماۋ ءۇشىن تاۋ بەتكەيلەرىنە شىقپاۋعا، سونداي-اق جەكە قاۋىپسىزدىك شارالارىن ساقتاۋعا، تاۋدا جاياۋ سەرۋەندەۋدەن باس تارتۋعا شاقىرادى.
«ەگەر قاتتى جاۋىن-شاشىن (قار، جاڭبىر) نەمەسە قاتتى جەل تۋرالى داۋىلدى ەسكەرتۋ حابارلانسا، اۋا رايى جاقسى بولعانشا بيىك تاۋلى ايماقتارعا سەرۋەندى كەيىنگە قالدىرعان دۇرىس. ەگەر ءسىز تاۋدا بولساڭىز، اباي بولۋ كەرەك جانە اۋا رايىنىڭ وزگەرۋىن باقىلاپ وتىرۋ قاجەت. تاۋ بەتكەيلەرىندە قاردىڭ ىعىسۋىن، قاردان تۇيىرشىكتەردى بايقاساڭىز، وندا تاۋعا بارماعانىڭىز ءجون – بۇل قاردىڭ تۇراقسىز كۇيدە ەكەنىن، قار كوشكىنى بولۋى مۇمكىن ەكەنىن كورسەتەدى»، - دەپ حابارلادى ۆەدومستۆونىڭ باسپا ءسوز قىزمەتى.