الماتى قالاسىنداعى №224 مەكتەپتە اتا-انالاردىڭ پسيحولوگيالىق مادەنيەتىن ارتتىرۋعا باعىتتالعان ەرەكشە ءىس-شارا ءوتتى. جيىنعا مەكتەپ اكىمشىلىگى، پەداگوگتەر مەن اتا-انالار قاتىستى.
ارت-پراكتيكۋمنىڭ نەگىزگى ماقساتى – اتا-انا مەن مەكتەپ اراسىنداعى ءوزارا سەرىكتەستىكتى نىعايتۋ، وتباسىلىق قارىم-قاتىناستى جاقسارتۋ جانە ەموسيونالدىق دەنساۋلىقتى قولداۋ. سونداي-اق اتا-انالاردىڭ پسيحولوگيالىق ساۋاتتىلىعىن ارتتىرۋ، ءوزىن-وزى تانۋ مەن كۇيزەلىستى باسقارۋ ادىستەرىن مەڭگەرتۋ كوزدەلدى.
– ارت-پراكتيكۋم شىعارماشىلىق ءىس-شاراسىنا اتا-انالار كەڭەسىنىڭ مۇشەلەرى قاتىسىپ وتىر. مەكتەبىمىز جاڭادان اشىلعاندىقتان، وقۋشىلارىمىز، ۇستازدارىمىز بەن اتا-انالارامىزدى بىر-بىرىمەن جاقىنىراق تانىستىرۋ ماقساتىندا باس قوسىپ وتىرمىز. بولاشاقتا ءبارىمىز بىرىگە وتىرىپ، مەكتەپتىڭ مارتەبەسىن كوتەرۋ باعىتىندا جۇمىس ىستەيمىز. باستى مىندەت «ۇستاز – وقۋشى – اتا-انا ۇشتىگىن» قۇرۋ، – دەدى مەكتەپ ديرەكتورى رايزا احمەتوۆا.
شارا باعدارلاماسى ءۇش نەگىزگى باعىتتى قامتىدى. پسيحولوگيالىق ترەنينگتە مەكتەپتىڭ پسيحولوگ ماماندارى اتا-انالارعا كوڭىل كۇيدى باسقارۋ، ىشكى كۇيدى رەتتەۋ جانە ءوزارا تۇسىنىستىككە جەتۋ جولدارىن ءتۇسىندىرىپ، ءتيىمدى كوممۋنيكاسيا داعدىلارىن دامىتۋعا ارنالعان جاتتىعۋلار جۇرگىزدى. ترەنينگ بارىسىندا قاتىسۋشىلار ءتۇرلى ومىرلىك جاعداياتتاردى تالقىلاپ، بالامەن سويلەسۋدىڭ جاڭا تاسىلدەرىن مەڭگەردى.
ART تەراپيا باعىتىندا كاسىبي ماماندار ارت-تەراپيا ادىستەرىن قولدانا وتىرىپ، شىعارماشىلىق ارقىلى ىشكى سەزىمدەردى بەينەلەۋ مۇمكىندىگىن قولدانا الدى. اتا-انالار بوياۋ، كوللاج، سيمۆولدىق سۋرەت سالۋ سەكىلدى تاسىلدەرمەن ءوز كوڭىل كۇيىن ەركىن جەتكىزدى.
ءىس-شارا سوڭىندا مەكتەپ وقۋشىلارى مەن مۇعالىمدەرىنىڭ دايىنداعان ونەرى كورەرمەن نازارىنا ۇسىنىلدى. كونسەرت اتا-انالاردىڭ كوڭىل-كۇيىن كوتەرىپ، جيىندا جىلى اتموسفەرا ورناتتى.
ارت-پراكتيكۋمعا قاتىسقان اتا-انا لاۋرا جانات قىزى جۇرگىزىلگەن فورماتتىڭ وتە ماڭىزدى ەكەنىن اتاپ ءوتتى. ايتۋىنشا، مۇنداي شىعارماشىلىق جاتتىعۋلار ولاردىڭ ءوز سەزىمدەرىن ءتۇسىنىپ، بالالارىنىڭ ەموسيونالدىق دامۋىن قولداۋعا مۇمكىندىك بەرەدى. ال ترەنينگتە ۇيرەنگەن جاتتىعۋلارى وتباسىنداعى قارىم-قاتىناستى جاقسارتۋعا باعىتتالعانىن جاسىرمادى.
– بۇل مەكتەپتە قىزدارىم ءبىلىم الادى. ءىس-شاراعا قاتىسقانىما قۋانىشتىمىن. بالاعا بىلىممەن قاتار تاربيەنى دە بەرۋ اسا ماڭىزدى. ارت-پراكتيكۋم – مەكتەپ پەن اتا-انا اراسىنداعى ىنتىماقتاستىقتى جاڭا دەڭگەيگە كوتەرەتىن، ءبىر-بىرىن تۇسىنۋگە جانە قولداۋعا باعىتتالعان ماڭىزدى باستاما، – دەدى اتا-انا.
اتالعان ءبىلىم ورداسى بۇل جوباسى ارقىلى اتا-انالاردىڭ پسيحولوگيالىق مادەنيەتىن ارتتىرىپ، وتباسىلىق قۇندىلىقتاردىڭ ماڭىزىن ۇعىندىردى ءارى ءبىلىم بەرۋ پروسەسىنە جاقسى جاعىنان اسەر ەتەتىنىن كورسەتتى.