باق-تان امەريكالىق جانە قىتايلىق پلاتفورمالاردىڭ ءوزارا باسەكەسى تۋرالى ءبىلىپ وتىرامىز. ماسەلەن، جۇڭگو تاراپى نەبارى 6،5 ميلليون دوللارعا DeepSeek پلاتفورماسىن جاساعان. ونىڭ تيىمدىلىگى ميللياردتاعان دوللار جۇمسالعان پلاتفورمالاردان اسىپ تۇسكەن. بۇل جونىندە «ايقىن» گازەتىنە بەرگەن «جاۋاپكەرشىلىك جۇگى جەڭىل بولمايدى» بۇگىنگى سۇحباتىندا مەملەكەت باسشىسىنىڭ كەڭەسشىسى – باسپا ءسوز حاتشىسى بەرىك ءۋالي اتاپ ايتتى. «مىنە، وسىنداي قازىرگى زاماننىڭ سۇرانىسىن جەتىك ءبىلىپ قانا قويماي، ونى قازاقستان قوعامىنا دەندەپ ەنگىزۋ ماقساتىندا مەملەكەت باسشىسى جاساندى ينتەللەكتى سالاسىنداعى وزىق ويلى تۇلعالارمەن ءجيى كەزدەسەدى. جۋىردا عانا وسى سالاداعى قىتايلىق كاسءىپكەر لي كاي فۋدى قابىلداعان بولاتىن. ۇكىمەتتىڭ كەڭەيتىلگەن وتىرىسىنداعى ءسوزءىندە دە جۇڭگو تاجىريبەسىن كەڭىنەن زەردەلەۋ جونىندە تاپسىرما بەرۋى بەكەر ەمەس. بۇل سالادا ءبىز باعىندىراتىن بيىكتەر ءالى الدا» دەدى پرەزيدەنت كەڭەسشىسى.
سيفرلاندىرۋ سالاسىنا مىڭداعان مامان دايارلانۋدا. اتاپ ايتار بولساق، ەلوردادا Al-Sana جاساندى ينتەللەكتىنى وقىتۋ ورتالىعى اشىلدى. بۇل باعىتتا جۇيەلى جۇمىس جۇرگىزىلۋدە. وعان قوسا، جاڭا قاۋىپ-قاتەرلەر دە كەزىگىپ وتىراتىنى بار. بۇگىندە كيبەرالاياقتىقتان قورعانۋ ماسەلەسى وتە وزەكتى. ماسەلەن، قىلمىستىق ىستەردىڭ 80 پايىزىنىڭ اشكەرەلەنبەۋى ارنايى قۇزىرلى ورگاندارىمىزدىڭ سيفرلى الەۋەتىن ءالى دە جەتىلدىرۋىن كەرەك ەتەدى. ويتكەنى مەملەكەت ءۇشىن ازاماتتاردىڭ قاۋىپسىزدىگى ەڭ باستى ورىندا.
وسى ورايدا سيفرلاندىرۋمەن ىلەسە كەلگەن جاساندى ينتەللەكت (جي) –قارقىندى دامۋ ۇستىندەگى تەحنولوگيانىڭ ءبىرى. ءتىپتى، بۇل تەحنولوگيا IT سالاسىمەن شەكتەلمەي، شىعارماشىلىق يندۋسترياعا دا ايتارلىقتاي ىقپال ەتۋدە. بازبىرەۋلەر ءجي-دى شىعارماشىلىققا ءقاۋىپ رەتىندە قاراستىرعانىمەن، كوپشىلىك ونى جاڭا مۇمكىندىكتىڭ باستاۋى دەپ بىلەدى. اتالعان تاقىرىپتا ساراپشىلاردىڭ ناقتى پىكىرىن ءبىلىپ، كرەاتيۆتى يندۋستريادا جي-مەن جۇمىس ىستەيتىن ماماندارمەن كەڭەستىك.
الدىمەن ءجي-دىڭ كرەاتيۆتى يندۋسترياعا اسەرىن بىلمەك بولدىق. الماتىداعى كرەاتيۆتى يندۋستريا وكىلدەرىمەن پىكىر الماسۋ بارىسىندا ولاردىڭ كوزقاراسى ءارالۋان بولعانىمەن، ويلارى ورتاق دەپ تۇيدىك. بايقاعانىمىزداي، جاساندى ينتەللەكت كرەاتيۆتى پروسەستى تولىق الماستىرا الماسا دا، ونى ايتارلىقتاي وزگەرتە الاتىنداي ەكەن. جي مۇمكىندىگى مەن شەكتەۋىن دە بىلمەك بولدىق.
ساراپشىلاردىڭ پىكىرىنشە، جي شىعارماشىلىق يندۋستريادا ءۇش نەگىزگى باعىتتا قولدانىلادى. بىرىنشىدەن، بۇل – جىلدام يدەيا گەنەراسياسى. ديزايندا، ماركەتينگ پەن جارنامادا باستاپقى يدەيانى جاساۋعا جاردەمدەسەدى. ەكىنشىدەن، قايتالاناتىن جۇمىستى اۆتوماتتاندىرۋعا قاجەت. بۇل دەگەنىمىز، مونتاج، كود جازۋ، ءماتىندى وڭدەۋ ءتارىزدى تەحنيكالىق تاپسىرمالاردى تياناقتاپ، جەڭىلدەتەدى. ءۇشىنشىسى – جەكە اۋديتورياعا باعىتتالعان كونتەنت جاساۋ. ماسەلەن، Netflix جانە Spotify سياقتى پلاتفورمالار ءجي-دى قولدانۋشىنىڭ قالاۋىن بولجاۋعا پايدالانادى.
دەگەنمەن، ونىڭ باستى شەكتەۋلەرى دە بار. بۇل – شىعارماشىلىقتىڭ تۇپكى ءمانىن تۇسىنبەۋى، جاڭاشىل يدەيا تۋدىرا الماۋى مەن ادام ەموسياسىن جەتكىزە الماۋى. سولاي بولا تۇرا، جاساندى ينتەللەكت شىعارماشىلىق سالالاردى وزىنشە تۇبەگەيلى وزگەرتۋگە تىرىسىپ باعۋدا. جاڭا تەحنولوگيا ادام بالاسىنىڭ ورنىن باسا الماسا دا، سونى مۇمكىندىكتەر تۋىنداتۋعا بارىن سالۋدا.
وسى رەتتە كرەاتيۆتى يندۋستريا ماماندارىنا ماڭىزدىسى – ءجي-دى قاجەتىنشە دۇرىس پايدالانىپ، ءوز داعدىسىن دامىتۋعا كىرىسۋ. وسى ماسەلەرگە ۇڭىلگەندى ءجون دەپ تاپتىق. ال، سىزدىڭشە جاساندى ينتەللەكت شىعارماشىلىققا كومەكتەسە مە، الدە كەدەرگى كەلتىرە مە؟
· تاقىرىپقا وراي
اليحان تۇرىسبەك،
گرافيكالىق ديزاينەر:
يدەانى تەزدەتەدى
بۇرىن لوگوتيپ جاساۋعا بىرنەشە كۇن كەتسە، بۇگىندە جي ارقىلى يدەيالاردى تەزىرەك جاساپ شىعۋعا بولادى. سويتسە دە، ساپالى ءونىم جاساۋعا ادامنىڭ شىعارماشىلىق تۇيسىگى وتە كەرەك. جي ۇسىنعان نۇسقالار شيكى بولىپ كەلەدى، ونى وڭدەۋ ءۇشىن تاجىريبە قاجەت.
ايدانا ءابدىراحمانوۆا،
كونتەنت-مەنەدجەر:
جۋرناليستيكادا فاكچەكينگ ماڭىزدى
جي ءماتىن جازۋدا دا كومەكتەسەدى. ءبىراق ونىڭ جازعاندارى كوبىنەسە شابلوندى بولىپ شىعادى. جۋرناليستيكادا فاكچەكينگ ماڭىزدى، ال جي ءالى دە جالعان اقپارات تاراتۋ ءقاۋپىن تۋدىرادى. سوندىقتان ول كومەكشى قۇرال رەتىندە عانا قولدانىلۋى كەرەك.