جاڭا وقۋ جىلىن كەي شۆەد مەكتەپتەرى ەلەكتروندى قۇرىلعىسىز وتكىزبەك.
ەندى ولار ساباق بارىسىندا كومپيۋتەر، پلانشەت پايدالانبايدى. ۇستازدار قاۋىمى جاڭا تەحنولوگيا وقۋشىلاردىڭ دامۋ ۇردىسىنە كەرى اسەر تيگىزەدى دەيدى. ستوكگولمداعى بۇل شۆەد مەكتەبىندە جاڭا وقۋ جىلى ادەتتەگىدەن وزگەشە باستالدى. وقۋشىلار ەندى ساباق بارىسىندا پلانشەت پايدالانباي، قالام ۇستاپ قاعازعا جازۋ-سىزۋدى داعدىعا اينالدىرماق، دەپ حابارلايدى Almaty-akshamy.kz 24.kz-كە سىلتەمە جاساپ.
«كومپيۋتەرمەن جازۋ ارقىلى قولجازبانىڭ نە ەكەنىن ۇمىتامىز. ال قولمەن جازساڭ ادەمى ءارى تازا جازۋدى ۇيرەنەسىڭ. ماعان ويىمداعىنى پلانشەتكە ەمەس، داپتەرگە ءتۇسىرۋ الدەقايدا ءتيىمدى»، - دەيدى 3 كۋرس ستۋدەنتى حەنريك ترولل ادامس.
ۇكىمەت ءبىلىم بەرۋ جۇيەسىنىڭ ساندىق تەحنولوگياعا كوشۋىن قۇپتاپ وتىر. ويتكەنى بۇل الەمدە بار تاجىريبە. مەكتەپتەردە ءار بالاعا جەكە پلانشەت تە بەكىتىلگەن.
«مەن ماتەماتيكا پانىندە پلانشەتتى قولدانامىن، وندا ءبىز ءار ءتۇرلى باعدارلامالاردى جۇزەگە اسىرامىز. ءبىراق ءماتىن جازۋ ءۇشىن پايدالانبايمىن. 10 جاسقا تولعانشا وقۋشىلار دا تەحنولوگياعا ۇيرەنىسپەۋى كەرەك، ويتكەنى بۇل ۋاقىتتا ولاردىڭ جەكە قولجازباسى قالىپتاسادى. وسىنى داعدىعا اينالدىرسا، قولمەن جازۋعا ماشىقتانادى. ال قول مەن ميدى قاتار قوزعاۋ اقپاراتتى جىلدام قابىلداۋعا مۇمكىندىك بەرەدى»، - دەيدى ءمۇعالىم كاتارينا برانەليۋس.
ءبىلىم بەرۋ جۇيەسىن تولىق تەحنولوگياعا كوشىرۋگە يۋنەسكو ۇيىمى تۇبەگەيلى قارسى. مەكتەپ باسشىلىعى دا ءداستۇرلى ادىستەردەن بىردەن باس تارتۋعا قارسى.
«ۇكىمەت تە، مەكتەپ تە بالالارمەن تاجىريبە جاساماۋى كەرەك. قانداي ناتيجە بەرەتىنىن بىلمەي، ءبىز ءوزىمىز تولىق مەڭگەرمەگەن دۇنيەلەردى وقۋشىلارعا ۇيرەتە المايمىز. جاڭاشىلدىق مۇمكىن 1 اپتا، 1 ايدان سوڭ جۇيەگە جاقسى ناتيجە اكەلۋى مۇمكىن، ءبىراق الداعى ەكى جىلدا قالاي بولارى بەلگىسىز»، - دەيدى مەكتەپ ديرەكتورى كارولين كەرينگ.
ساراپشىلاردىڭ پىكىرىنشە، سالادا ولقىلىق ورىن الماس ءۇشىن تەحنولوگياعا ەمەس، بىلىمگە كوبىرەك كوڭىل ءبولۋ كەرەك.
«مەن وقۋ باعدارلاماسىنا وتە سىن كوزبەن قارايمىن. سالا ۇلكەن جاۋاپكەرشىلىكتى جۇكتەيدى، وقۋشى-ستۋدەنتتەرگە تاجىريبە جاساۋدى ەمەس، كومەكتەسىپ، قولدان كەلگەنىن ۇيرەتۋدى ماقسات ەتەدى. الدىمەن، وقۋ باعدارلاماسىندا بىلىمگە باسا نازار اۋدارۋ كەرەك. ال ءىس جۇزىندە تەحنولوگيانى كوبىرەك قولدانىلاتىنى بەلگىلى بولدى. كىتاپ بەتىن اشىپ، وقۋ، جازۋ ارتتا قالىپ بارادى»، - دەپ حابارلايدى ءبىلىم بەرۋ جۇيەسىنىڭ ساراپشىسى ينگەر ەنكۆيست.
ولقىلىقتى جويۋ ءۇشىن يۋرگاردسكوللان مەكتەبى وقۋشىلارعا ساباقتان تىس ۋاقىتتا تەحنولوگيانى پايدالانۋعا تىيىم سالدى. ەندى ولار قوڭىراۋ كەزىندە پلانشەتكە ۇڭىلمەي، مەكتەپتەگى ويىن الاڭىندا ءتيىمدى ۋاقىت وتكىزبەك.