كوروناۆيرۋس الەمدىك تاقىرىپقا اينالعالى قاشان، ىندەتپەن كۇرەس كۇشەيگەن سايىن، اۋرۋ دا ۇدەپ بارادى. قاراپايىم ساقتىق شارالارىن ساقتاماۋ مەن جاۋاپكەرشىلىكتىڭ جوقتىعىنان دا زارداپ شەگىپ وتىرعانىمىز جاسىرىن ەمەس.
قازاقستاننىڭ دا ەپيداحۋالى ءماز ەمەس، بۇگىنگى مالىمەت بويىنشا، ەلىمىزدىڭ ءبىر ءوڭىرى عانا «جاسىل» ايماقتا ورنالاسقان، 120 488 ادام كوروناۆيرۋس ينفەكسياسىنان ەمدەلىپ جاتىر، دەپ حابارلايدى Almaty-akshamy.kz ءتىلشىسى.
COVID-19 تارالۋىنا جول بەرمەۋ جونىندەگى ۆاك تەلەگرام كانالىنىڭ ماتەريالدارىنا سۇيەنە وتىرىپ، دۇنيە جۇزىندەگى كوۆيدتىك جاعدايعا شولۋ جاسايىق.
توكيوداعى پاراليمپيادا كورەرمەندەرسىز وتەدى. NHK تەلەارناسىنىڭ مالىمەتىنشە، پاراليمپيادا ءىس-شارالارىنا بارلىعى 770 مىڭعا جۋىق بيلەت ساتىلعان ەكەن. ۇيىمداستىرۋشىلار قابىلداعان شەشىمگە سايكەس، بيلەت ساتىپ العاندارعا جۇمسالعان قاراجات كەرى قايتارىلادى. ويىندار 24 تامىز بەن 5 قىركۇيەك ارالىعىندا وتەدى.
مولدوۆادا COVID-19 قايتا ورشۋىنە بايلانىستى كارانتيندىك شارالار كۇشەيتىلدى. ولار بارلىق جابىق قوعامدىق ورىنداردا، سونىڭ ىشىندە قوعامدىق كولىكتەردە مىندەتتى تۇردە ماسكا كيۋدى قايتا ەنگىزدى. سونداي-اق، ادامدار اراسىندا كەم دەگەندە 1 مەتر الەۋمەتتىك قاشىقتىقتى ساقتاۋ مىندەتتى بولىپ تابىلادى.
شري-لانكا دەنساۋلىق ساقتاۋ ءمينيسترى COVID-19-بەن كۇرەسۋدە سيقىرشىلاردىڭ كومەگىنە جۇگىنگەنى ءۇشىن قىزمەتىنەن بوساتىلدى. الايدا پاۆيترا ۆانناراچچي ۇكىمەت قۇرامىندا قالادى جانە كولىك مينيسترلىگىن باسقارادى. دەنساۋلىق ساقتاۋ ءمينيسترى قىزمەتى بۇرىنعى بۇقارالىق اقپارات ءمينيسترى كەحەليا رامبۋكۆەللاعا بەرىلدى.