كۇدىكتى الماتى قالاسىنا قاشپاق بولعان جەرىنەن ۇستالدى
تۇركىستان وبلىسى، ورداباسى اۋدانىندا شوپان بولىپ جۇمىسقا ورنالاسقان شەتەلدىك ازامات اسىل تۇقىمدى قوشقارلاردى ساتىپ جىبەرگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، وزبەكستان رەسپۋبليكاسىنان كەلگەن ازامات قويشى بولىپ جۇمىسقا ورنالاسىپ، كەيىن 5 باس قوشقاردى تانىستارىنا ساتىپ جىبەرگەن. اقشانى الا سالىسىمەن قالعان مالدى قاراۋسىز قالدىرىپ، ءوزى بەلگىسىز باعىتقا قاشىپ كەتكەن. بۇل جايىندا جابىرلەنۋشىگە تانىسى حابارلاسىپ، قويلارى قاراۋسىز جۇرگەنىن جەتكىزگەن. مال يەسى پوليسياعا ارىزدانعان سوڭ، ءتارتىپ ساقشىلارى قويشىنى ىزدەستىرگەن. ناتيجەسىندە كۇدىكتى الماتى قالاسىنا قاشپاق بولعان جەرىنەن ۇستالدى.
«كۇدىكتى اۋداندىق پوليسيا بولىمىنە جەتكىزىلىپ، جاۋاپ الىندى. ونىڭ ءبىر جىلدان بەرى جابىرلەنۋشىنىڭ قويلارىن باققانى انىقتالدى. قازىرگى تاڭدا كۇدىكتى ازاماتقا قاتىستى سوتقا دەيىنگى تەرگەۋ امالدارى جۇرگىزىلىپ جاتىر. ايعاقتى زات رەتىندە تالان-تاراجعا تۇسكەن مالدار الىنىپ، زاڭدى يەسىنە قايتارىلدى»، - دەلىنگەن حابارلامادا.