تەوريالىق تۇرعىدان تۇماۋ مەن كوروناۆيرۋستى ءبىر ۋاقىتتا جۇقتىرۋعا بولادى، ۋاقىتىلى ەمدەلىپ، ونىڭ الدىن الماسا، سالدارى اۋىر بولماق، - دەيدى الماتىداعى №4 قالالىق ەمحانانىڭ ينفەكسيونيست-دارىگەرى شولپان اۋەلبەكوۆا.
شولپان اۋەلبەكوۆانىڭ ايتۋىنشا، الماتىدا ماۋسىمدىق تۇماۋعا قاتىستى احۋال تۇراقتى. بۇگىندە تۇماۋدىڭ اۋىر تۇرىمەن سىرقاتتانعان ناۋقاستار تىركەلگەن جوق.
«ءبىز ماۋسىمدىق تۇماۋعا دايىنبىز. جىل سايىن ەپيدەميولوگيالىق شارالار جۇرگىزىلەدى. تۇماۋ مەن جرۆي ء-دىڭ الدىن الۋ باعىتتارىنىڭ ءبىرى – حالىقتىڭ بەلگىلى ءبىر ساناتىن قامتيتىن ۆاكسينالاۋ. تۇماۋعا قارسى دارى-دارمەكتەر دە جەتكىلىكتى»، - دەيدى دارىگەر.
سپيكەردىڭ سوزىنشە، ەگەر كوروناۆيرۋس پەن تۇماۋ ءبىر ۋاقىتتا جۇقسا، ونىڭ سالدارى اۋىر بولۋى مۇمكىن.
«كوروناۆيرۋس مەحانيزمىندە يممۋندىق جۇيەنىڭ بۇزىلۋىنان مۋلتيۆاسكۋليارلى سيندروم پايدا بولادى. بۇل ينفەكسيالاردىڭ كومبيناسياسى ناۋقاستىڭ جاعدايىن ناشارلاتۋى مۇمكىن»، - دەپ ءتۇسىندىردى ول.
سونىمەن قاتار، ول كوروناۆيرۋس ينفەكسياسىن تۇماۋدان اجىراتا الۋ وتە ماڭىزدى ەكەنىن اتاپ ءوتتى. ويتكەنى بۇل اۋرۋلاردى ەمدەۋ ءادىسى ءارتۇرلى.
«تۇماۋ ادەتتە جەلتوقسان-اقپان ايلارىندا ءورشيدى. تۇماۋ دا، كوروناۆيرۋس تا - ءجىتى جۇقپالى اۋرۋلار. باستاپقى كەزەڭدە ەكەۋىنىڭ بەلگىلەرى ۇقساس كەلەدى. سونداي-اق ۆيرۋستاردىڭ ەكەۋى دە اۋا-تامشى جولى جانە تۇرمىستىق بايلانىس ارقىلى جۇعادى. الايدا، كوروناۆيرۋس قاراپايىم تۇماۋعا قاراعاندا – اۋىر. بۇل ىندەتتىڭ اسقىنۋ پايىزى جوعارى»، - دەيدى ينفەكسيونيست.
ءسوز سوڭىندا دارىگەر بارلىق سانيتارلىق شارالاردى ساقتاۋدى ۇسىندى.
«بەتپەردە رەجيمى مەن الەۋمەتتىك قاشىقتىقتى ساقتاۋ قاجەت. قولدى ءجيى جۋىپ، انتيسەپتيك قولدانۋدى توقتاتپاعان ءجون. ەڭ باستىسى، ۆاكسينا الۋ كەرەك. بۇل – اۋرۋدىڭ الدىن الۋدىڭ بىردەن-بىر جولى»، - دەپ قورىتىندىلادى دارىگەر.