الماتى مەملەكەتتىك قۋىرشاق تەاترىنىڭ رەپەرتۋارى جاڭا سپەكتاكلمەن تولىقتى.
كورىكتى كەلبەتىمەن عانا ەمەس، قۋىرشاق ونەرىندە وزىق باعىتىمەن ەرەكشەلەنەتىن گرۋزيانىڭ استاناسى – تبيليسي قالاسىنان ارنايى شاقىرتىلعان رەجيسسەر نيكولوز ساباشۆيلي ايگىلى كلاسسيك جازۋشى نيكولاي گوگولدىڭ «شينەل» پوۆەسىن تەاتر تورىندە قۋىرشاق بەينەسىمەن جاڭاشا فورماتتا كورەرمەنگە تارتۋ ەتتى.
الماتى مەملەكەتتىك قۋىرشاق تەاترى كىشكەنتاي بۇلدىرشىندەرگە عانا ەمەس، سونىمەن قاتار، جاسوسپىرىمدەر مەن ەرەسەكتەرگە دە ارنالعان قويىلىمدار ساحنالاۋدى جۇمىس تاجىريبەسىنە ەنگىزگەن بولاتىن. ناتيجەسىندە الەمدىك جانە وتاندىق ۇزدىك ادەبي جانە دراماتۋرگيالىق شىعارمالاردان تاڭدالعان جاڭاشا فورماتتاعى «انا جۇرەگى»، «انا – جەر انا»، «رومەو مەن دجۋلەتتا»، «ماكبەت. يلليۋزيا»، «مەن ءبىر جۇمباق اداممىن... اباي»، «ومىر-وزەن»، «شال مەن تەڭىز»، «چەمپيون» قويىلىمدارى ونەر ورداسىنىڭ تۇراتقى رەپەرتۋارىنا ەندى.
پرەمەراسى بولعان «شينەل» قويىلىمى دا وزىندىك وزگەشە رەجيسسەرلىك شەشىمىمەن، تەرەڭ فيلوسوفيالىق استارىمەن، ايرىقشا ەستە قالاتىن قۋىرشاق وبرازىمەن ەرەكشەلەنەتىن سپەكتاكل بولدى. قويىلىمنىڭ رەجيسسەرى ءارى سۋرەتشىسى – نيكولوز ساباشۆيلي، بالەتمەيستەرى – رينات بيليبايەۆ. اتالمىش قويىلىمنىڭ باستى ءرولىن قۋىرشاق تەاترىنىڭ تالانتتى ءارى بەلدى ءارتيسى شوحان قۇلنازاروۆ سومدادى.
رەجيسسەر، اكتەر، پەداگوگ، گرۋزيا قۋىرشاق تەاترلار بىرلەستىگىنىڭ باسشىسى نيكولوز ساباشۆيلي «شينەل» قويىلىمى جايىندا پىكىر ءبىلدىرىپ، الماتىدان العان اسەرىمەن ءبولىستى.
«بارلىعى دا شىعارماشىلىق پىكىرلەر مەن جاڭا يدەيالارعا دەگەن قىزىعۋشىلىق ناتيجەسىندە تۋعان دوستىقتان باستالدى دەپ ايتا الامىن. بۇل ساپار مەنىڭ اسەم الماتىعا كەلگەن ءۇشىنشى تاجىريبەم. 2023 جىلى مەن «ورتەكە» قۋىرشاق تەاترلار فەستيۆالىندە الماتى مەملەكەتتىك قۋىرشاق تەاترىنىڭ ديرەكتورىمەن تانىسقان بولاتىنمىن. بىرلەسكەن جوبا دايىنداۋ تۋراسىندا ءبىرقاتار پىكىرلەر ايتىلىپ، گرۋزيا قۋىرشاق تەاترلار بىرلەستىگى مەن الماتى مەملەكەتتىك قۋىرشاق تەاترى اراسىندا ىنتىماقتاستىق مەموراندۋمىنا قول قويىلدى. اراعا ءبىر جىل سالىپ، جولىم اسەم الماتىعا قايتا ءتۇسىپ وتىر. قوناقجاي دا دارحان پەيىلدى قۋىرشاق تەاترى مەنى وتە جىلى قابىلدادى. ءوزىڭدى ەركىن ءارى جايلى سەزىنگەن ورتادا شىعارمالىق تا وڭاي ءارى قىزىقتى ءوربيدى دەپ ەسەپتەيمىن. مەن قويىلىم ساحنالاۋعا كەلىسكەن ساتتەن دۇرىس تاڭداۋ جاساعانىما كۇماندانعان ەمەس. ناتيجەسىن پاتشا كوڭىلدى كورەرمەن باعالاي جاتار»، – دەدى رەجيسسەر.