شەتەلگە شىعاتىن قازاقستاندىقتار دۇنيەجۇزىلىك دەنساۋلىق ساقتاۋ ۇيىمى ماقۇلداعان ۆاكسينالاردى ەكتىرە الادى. سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ اتالمىش ساناتقا قانداي ازاماتتار كىرەتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى تاڭدا ق ر باس سانيتار دارىگەرىنىڭ 2022 جىلعى 13 قاڭتارداعى №2 قاۋلىسىنا سايكەس، جەكەلەگەن جاعدايلاردا ۆەدومستۆوارالىق كوميسسيانىڭ شەشىمى بويىنشا دۇنيەجۇزىلىك دەنساۋلىق ساقتاۋ ۇيىمى ماقۇلداعان ۆاكسينالارمەن كوروناۆيرۋس ينفەكسياسىنا قارسى ۆاكسيناسيانىڭ تولىق كۋرسىن قايتا وتۋگە مۇمكىندىك بەرىلەدى»، - دەپ ءتۇسىندىردى ەرجان بايتانايەۆ.
ايتۋىنشا، مۇنداي مۇمكىندىك بەرىلگەن ازاماتتار قاي ساناتقا جاتاتىنىنا بايلانىستى ءتۇرلى تالاپتاردى ورىنداۋى قاجەت.
سونىمەن، ددۇ تىركەۋىنەن وتكەن ۆاكسينالاردى مىنا ساناتتاعى ازاماتتار قوسىمشا قابىلداي الادى:
حالىقارالىق دەڭگەيدە قازاقستاننىڭ اتىنان ارەكەت ەتەتىن تۇلعالار؛
ۇكىمەتارالىق كەلىسىمدەر مەن شارتتار اياسىندا، ونىڭ ىشىندە اكادەميالىق ۇتقىرلىق شەڭبەرىندە شەتەلدە وقيتىن ستۋدەنتتەر جانە ولاردىڭ وتباسى مۇشەلەرى؛
شەتەلگە ەمدەلۋگە جىبەرىلگەن ناۋقاستار مەن ولاردى ەمدەۋگە ەرتىپ جۇرەتىن ادامدار.
قاجەتتى قۇجاتتار:
ءارتۇرلى سەبەپتەرمەن شەتەلگە شىعۋى قاجەت بولعان تۇلعالار ءتيىستى ۆەدومستۆوعا ساپار سەبەبىن راستايتىن قۇجاتىن ۇسىنۋى قاجەت.
مىسالى، شەتەلدە ءبىلىم الۋشىلار ق ر ءبىلىم جانە عىلىم مينيسترلىگىنە راستاۋشى قۇجات ۇسىنادى؛ شەتەلدە ەمدەلۋگە مۇقتاج ناۋقاستار تۇرعىلىقتى جەرى بويىنشا مەديسينالىق ۇيىمعا نەمەسە اۋماقتىق دەنساۋلىق ساقتاۋ باسقارماسىنا قۇجات وتكىزەدى.
ستۋدەنتتەر ءۇشىن:
ق ر ءبىلىم جانە عىلىم مينيسترلىگىمەن بىرگە ازىرلەنگەن ءىس-قيمىل الگوريتمى بويىنشا:
«بولاشاق» حالىقارالىق ستيپەندياسىنىڭ يەگەرلەرى جانە ۇكىمەتارالىق كەلىسىمدەر مەن شارتتاردىڭ، ونىڭ ىشىندە اكادەميالىق ۇتقىرلىق شەڭبەرىندە شەتەلگە وقۋعا جىبەرىلەتىن ادامدار، شەتەلدىك وقۋ ورىندارىنا ءوز بەتىمەن تۇسكەن جانە ۇكىمەتارالىق كەلىسىمدەر مەن اكادەميالىق ۇتقىرلىق شەڭبەرىندە ءبىلىم الاتىن ستۋدەنتتەر، Work and travel باعدارلاماسى بويىنشا شەتەلگە شىعۋدى جوسپارلاعان ستۋدەنتتەر مەن ولاردىڭ وتباسى مۇشەلەرى ق ر ءبىلىم جانە عىلىم مينيسترلىگىنە جازباشا ءوتىنىش بەرەدى؛
سول وتىنىشتەر نەگىزىندە مينيسترلىك ءتىزىم جاساپ، ق ر دەنساۋلىق ساقتاۋ مينيسترلىگىنە جولدايدى؛
دەنساۋلىق ساقتاۋ مينيسترلىگى بۇل تىزىمدەردى مەديسينالىق ۇيىمداردا ۆاكسينالاۋدى ودان ءارى ۇيىمداستىرۋ ءۇشىن وڭىرلەردىڭ دەنساۋلىق ساقتاۋ باسقارمالارىنا جىبەرەدى؛
مەديسينالىق ۇيىمدار ستۋدەنتتەردى ۆاكسينالاۋدىڭ تولىق كۋرسىن قايتالاپ جۇرگىزەدى دە، تىزىمدەردى اقپاراتتىق جۇيەگە مالىمەتتەر ەنگىزۋ ءۇشىن رەسپۋبليكالىق ەلەكتروندىق دەنساۋلىق ساقتاۋ ورتالىعىنا (رەدسو) بەرەدى؛
كوروناۆيرۋس ينفەكسياسىنا قارسى ۆاكسينالاۋدىڭ تولىق كۋرسىن قايتادان اياقتاعاننان كەيىن جانە ەكپە العانى تۋرالى دەرەكتەردى اقپاراتتىق جۇيەگە eGov موبيلدىك قوسىمشاسىندا ەنگىزگەننەن كەيىن ستۋدەنتتەردىڭ اتىنا ەلەكتروندىق ۆاكسينالاۋ پاسپورتى مەن قاعاز نۇسقاداعى ۆاكسينالاۋ تۋرالى انىقتاما تولتىرىلادى.
شەتەلدە ەمدەلۋشىلەر ءۇشىن:
شەتەلگە ەمدەلۋگە جىبەرىلگەندەر مەن ولاردى ەرتىپ جۇرەتىن ادامدار مەديسينالىق ۇيىمعا قازاقستاننان تىس جەردە ەمدەلۋ قاجەتتىلىگىن راستايتىن قۇجات ۇسىنۋى قاجەت. وسى قۇجاتتاردىڭ نەگىزىندە مەديسينا قىزمەتكەرى ددۇ ماقۇلداعان ۆاكسينامەن كوروناۆيرۋس ينفەكسياسىنا قارسى ۆاكسينالاۋدى جۇرگىزەدى جانە دەرەكتەردى اقپاراتتىق جۇيەگە ەنگىزەدى.
كۆي-گە قارسى ۆاكسينالاۋدىڭ تولىق كۋرسىن قايتادان اياقتاعاننان كەيىن eGov موبيلدىك قوسىمشاسىندا ەمدەلۋشى مەن ونىڭ ساپارلاسىنىڭ اتىنا ۆاكسينالاۋدىڭ ەلەكتروندىق پاسپورتى مەن قاعاز نۇسقاداعى ۆاكسينالاۋ تۋرالى انىقتاما تولتىرىلادى.
قازاقستاننىڭ وكىلى رەتىندە ارەكەت ەتەتىن تۇلعالار ءۇشىن:
حالىقارالىق دەڭگەيدە قازاقستاننىڭ اتىنان ارەكەت ەتۋ ءۇشىن شەتەلگە شىعاتىن ادامدار ءتيىستى ۆەدومستۆوعا نەمەسە مەملەكەتتىك ورگانعا (ءبىلىم جانە عىلىم مينيسترلىگى، مادەنيەت جانە سپورت مينيسترلىگى جانە باسقا دا مينيسترلىكتەر) جۇگىنۋى قاجەت. ول ورگان ماسەلەنى ۆەدومستۆوارالىق كوميسسيانىڭ (قازاقستان رەسپۋبليكاسىنىڭ اۋماعىندا كوروناۆيرۋس ينفەكسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسيا) قاراۋىنا شىعارادى.
ق ر دەنساۋلىق ساقتاۋ مينيسترلىگى اتالعان ۆەدومستۆوارالىق كوميسسيا حاتتاماسىنىڭ نەگىزىندە كۆي-گە قارسى ۆاكسينالاۋعا جاتاتىن ادامداردىڭ ءتىزىمىن شەتەلگە شىعاتىن ادامداردى ۆاكسينالاۋدى ۇيىمداستىرۋ ءۇشىن اۋماقتىق دەنساۋلىق ساقتاۋ باسقارمالارىنا جىبەرەدى.
مەديسينالىق ۇيىمدار الگى تىزىمدەگى ادامدارعا ۆاكسينالاۋدىڭ تولىق كۋرسىن قايتالاپ جۇرگىزەدى جانە مالىمەتتەرىن اقپاراتتىق جۇيەگە ەنگىزەدى. كۆي-گە قارسى ۆاكسينالاۋدىڭ تولىق كۋرسىن قايتادان اياقتاعاننان كەيىن eGov موبيلدىك قوسىمشاسىندا اتالعان ادامداردىڭ اتىنا ۆاكسينالاۋدىڭ ەلەكتروندىق پاسپورتى مەن قاعاز نۇسقاداعى ۆاكسينالاۋ تۋرالى انىقتاما تولتىرىلادى.
قازاقستاندىقتار شەتەلگە شىعۋ ءۇشىن ددۇ ماقۇلداعان ۆاكسينالاردىڭ مىنا تۇرلەرىن قابىلداي الادى:
«VeroCell»، يناكتيۆتەندىرىلگەن «Sinopharm».
«VeroCell»:
كوروناۆيرۋسقا قارسى العاش رەت ەكپە الىپ تۇرعان قازاقستاندىقتاردىڭ ءبارى سالدىرا الادى؛
ال قايتادان ۆاكسينالاۋ كۋرسىنا (1 جانە 2 دوزا) جوعارىدا اتالعان ساناتتاعى شەت ەلدەرگە شىعاتىن قازاقستاندىقتار پايدالانا الادى.
«VeroCell» ەكى دوزالى ۆاكسينا. شەتەلگە شىعۋ ءۇشىن 21 كۇننەن كەيىن ەكى كومپونەنتتى الۋ كەرەك. دەنساۋلىق ساقتاۋ مينيسترلىگى ءار ەلدىڭ ءوز تالاپتارى بار ەكەنىن ەسكەرتتى. مىسالى، ەكىنشى كومپونەنتتەن كەيىن بەلگىلى ءبىر كەزەڭدى كۇتۋ قاجەت دەگەن سياقتى تالاپتار قويىلۋى مۇمكىن.