ساۋد ارابياسىنىڭ بيلىگى شەتەلدىك ازاماتتارعا ءيسى مۇسىلمان قاستەر تۇتاتىن قوس كيەلى قالاداعى جىلجىمايتىن مۇلىككە ينۆەستيسيا قۇيۋعا رۇقسات بەرەتىن شەشىم قابىلدادى.
بۇل جايىندا aqshamnews.kz islam.kz پورتالىنا سىلتمەمە جاساي وتىرىپ حابارلايدى.
ساۋديانىڭ كاپيتال نارىعىن باسقارۋ باسقارماسى اتاپ وتكەندەي، مۇنداي قادام شەتەل ينۆەستيسياسىن ەل ەكونوميكاسىنا تارتىپ، قاسيەتتى قوس قالانىڭ ينفراقۇرىلىمىن دامىتۋ ءۇشىن قولعا الىنىپ وتىر. ساۋديا اۋماعىنا بىرەر جىلدان سوڭ، دالىرەگى، 2030 جىلعا قاراي كەلەتىن قاجىلار قاراسى ارتادى. شامامەن 30 ملن ادام قاجىلىق پارىزىن وتەيتىن بولادى.
وسىنى ەسكەرگەن اتالعان اراب ەلىنىڭ بيلىگى كيەلى قوس قالانىڭ ينفراقۇرىلىمىن كەڭەيتۋگە قاجەتتى قارجىنىڭ كوزىن شەتەلدىك ينۆەستيسيامەن تولتىرۋعا مۇددەلى. وسى ورايدا 2019 جىلى مەملەكەت قاجىلىقتان 12 ملرد دوللار پايدا تاپقانىن ايتا كەتپەكپىز. قاجىلىق پەن ۇمرا – ساۋديا ەكونوميكاسىنىڭ ماڭىزدى تارماعى. ساۋديا بيلىگىنىڭ قاسيەتتى قوس قالاعا قاتىستى شەشىمى جاريالانا سالىسىمەن مەككەلىك قۇرىلىسشىلاردىڭ اكسيا باعاسى بىردەن 10 پايىزعا قىمباتتاپ شىعا كەلدى. دەگەنمەن، قوس قالاداعى جىلجىمايتىن مۇلىكتى ساتۋعا شەكتەۋ قويىلادى. ساۋديا ازاماتتىعىن الماعان تۇلعالارعا جىلجىمايتىن مۇلىكتى مەنشىكتەۋدە 49 پايىزدان اسىرمايدى.