سەرۆيس جەكە تۇلعالار ءۇشىن 2023 جىلدىڭ 23 قاڭتارىنان باستاپ 1 شىلدەگە دەيىن قولجەتىمدى بولادى
eGov.kz پورتالى مەن eGov Mobile موبيلدىك قوسىمشاسىندا شەتەلدەن اكەلىنگەن كولىكتەردى زاڭداستىرۋعا ارنالعان سەرۆيس ىسكە قوسىلدى، دەپ حابارلايدى Almaty-akshamy.kz «ۇلتتىق اقپاراتتىق تەحنولوگيالار» اق-عا سىلتەمە جاساپ.
سەرۆيس جەكە تۇلعالار ءۇشىن 2023 جىلدىڭ 23 قاڭتارىنان باستاپ 1 شىلدەگە دەيىن قولجەتىمدى بولادى.
ق ر ۇكىمەتىنىڭ 2023 جىلعى 11 قاڭتارداعى №13 قاۋلىسىنا سايكەس، قازاقستاندىقتار قازاقستان رەسپۋبليكاسىنا 2022 جىلدىڭ 1 قىركۇيەگىنە دەيىن اكەلىنگەن اۆتوكولىكتەردى eGov.kz پورتالىنىڭ «اۆتوكولىكتى زاڭداستىرۋ ءۇشىن تەكسەرۋ» اتتى جاڭا سەرۆيسى ارقىلى زاڭداستىرا الادى. جاڭا سەرۆيس تەك ەلەكتروندىق ءوتىنىش بەرۋگە ارنالعان. ءوتىنىش بويىنشا B (جەڭىل اۆتوموبيلدەر) جانە D1 (ميكرواۆتوبۋستار) ساناتىنداعى كولىكتەردىڭ كەلەسى تالاپتارعا ساي كەلۋ-كەلمەۋى تەكسەرىلەدى:
- كولىكتىڭ 2022 جىلدىڭ 1 قىركۇيەگىنە دەيىن اكەلىنۋى؛
- كولىكتىڭ قانداي دا ءبىر قىلمىسقا قاتىسى بولماۋى؛
- كەدەندىك راسىمدەردەن تۇگەل ءوتۋى.
جاڭا سەرۆيستى ەلەكتروندىق ۇكىمەت پورتالىنىڭ باستى بەتىندەگى «سەرۆيستەر» بولىمىنەن جانە «كولىك جانە كوممۋنيكاسيالار» - «اۆتوموبيل كولىگى» بولىمىنەن تابۋعا بولادى. ال eGov Mobile موبيلدىك قوسىمشاسىندا «جۇرگىزۋ جانە كولىك» بولىمىنە كىرۋ قاجەت.
«شەتەلدىك اۆتوكولىكتەردى زاڭداستىرۋ ءراسىمى ەكى كەزەڭدە جۇرەدى. اۆتوكولىك يەلەرى الدىمەن، eGov.kz پورتالىندا ءوتىنىش بەرۋى قاجەت، سودان كەيىن اۆتوكولىكتى تەكسەرۋ، كولىك قۇرالىن تەكسەرۋدەن وتكىزۋ، تىركەۋ الىمىن تولەۋ جانە مەملەكەتتىك ءنومىردى الۋ ءۇشىن مامانداندىرىلعان حالىققا قىزمەت كورسەتۋ ورتالىعىنا جۇگىنۋى كەرەك»،- دەپ اتاپ ءوتتى «ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكين.
EGov.kz پورتالىندا ەلەكتروندىق ءوتىنىش بەرۋ ءۇشىن كولىك يەسىنەن تالاپ ەتىلەدى:
- تۇرعىلىقتى جەرى بويىنشا تۇراقتى تىركەۋدە بولۋى؛
- قازاقستان رەسپۋبليكاسى ازاماتتىعىنىڭ بولۋى؛
- ءموبيلدى ازاماتتار بازاسىندا (ماب) تىركەلگەن بولۋى؛
- اۆتوكولىكتىڭ جانە كولىك قۇرالىنىڭ بۇرىنعى يەسى تۋرالى بارلىق قاجەتتى مالىمەتتى تولتىرۋى؛
- تەكسەرۋگە سۇراۋ جىبەرۋى؛
- كولىك قۇرالىن تەكسەرۋدەن وتكىزۋ ءۇشىن مامانداندىرىلعان حقكو-عا ەلەكتروندى كەزەكتى برونداۋى.
قىزمەت كورسەتۋ ناتيجەسى eGov.kz پايدالانۋشىcىنىڭ جەكە كابينەتىنە 15 مينۋت ىشىندە حابارلاما رەتىندە جىبەرىلەدى نەمەسە ءوتىنىشتى قاناعاتتاندىرۋدان باس تارتۋ تۋرالى دالەلدى جاۋاپ كەلەدى.
حابارلامانى العاننان كەيىن اۆتوموبيل يەسىنە اۆتوكولىكتى تەكسەرۋ، كولىك قۇرالىن تىركەۋدەن وتكىزۋ، 200 مىڭ تەڭگە مولشەرىندە تىركەۋ الىمىن تولەۋ، مەملەكەتتىك ءنومىر مەن كولىك قۇرالىنىڭ كۋالىگىن الۋ ءۇشىن اۆتوحقكو جانىنداعى تەكسەرۋ پۋنكتەرىنە كولىك قۇرالىن ۇسىنۋ قاجەت.
جاڭا سەرۆيستى «ۇلتتىق اقپاراتتىق تەحنولوگيالار» اق، ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ مەملەكەتتىك قىزمەتتەر كوميتەتى مەن ق ر ىشكى ىستەر مينيسترلىگى بىرلەسىپ جاساعان.