ەستىمەگەن ەلدە كوپ.
يتاليانىڭ ميلان تەحنولوگيالىق ينستيتۋتىنىڭ عالىمدارى جەۋگە جانە قايتا زاريادتاۋعا بولاتىن باتارەيا جاسادى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
ونى قۇراستىرۋعا ميندال، كاپەرس، بەلسەندى ەتىلگەن كومىر، تەڭىز بالدىرى، التىن جاپىراق جانە بالاۋىز پايدالانىلعان. بۇل قۋاتتاعىش ەلەكترودتى ميندال مەن كاپەرستەن الادى.
باتارەيا نەبارى 0،65 ۆولتتا جۇمىس ىستەيتىندىكتەن، ادام اعزاسىنا زيان تيگىزبەيدى. سوندىقتان، ونىمەن اسقازان-ىشەك اۋرۋلارىن انىقتاۋعا ارنالعان شاعىن سەنسوردى قۋاتتاندىرۋعا بولادى.
تاعى ءبىر ايتا كەتەتىن جايت، اككۋمۋلياتوردىڭ ەرەكشە ءپروتوتيپى ادام اسقازانىن تەكسەرگەننەن كەيىن سەنسورمەن بىرگە قورىتىلىپ كەتەدى. ياعني، ونى ورگانيزمنەن شىعارۋ ءۇشىن حيرۋرگيالىق وتا جاساۋ قاجەت ەمەس.