قازاقستان ازاماتتارى جاقىن ماڭداعى سايلاۋ ۋچاسكەسىنە الدىن الا حابارلاسۋى كەرەك
بيىل ناۋرىز ايىندا وتەتىن سايلاۋعا قاتىستى شەتەلدە 77 داۋىس بەرۋ ۋچاسكەسى اشىلادى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2023 جىلعى 19 ناۋرىزدا ق ر پارلامەنتى ءماجىلىسى مەن ءماسليحات دەپۋتاتتارىن سايلاۋ وتەدى. قازاقستاننىڭ شەتەلدەگى مەكەمەلەرىنىڭ جانىنان، ياعني 62 شەت مەملەكەتتە 77 سايلاۋ ۋچاسكەسى اشىلادى. داۋىس بەرۋگە قاتىسۋ ءۇشىن ءتيىستى شەت مەملەكەتتە تۇراتىن نەمەسە جەكە ءارى قىزمەتتىك، وقۋ، ىسكەرلىك، تۋريستىك ماقساتپەن جۇرگەن جانە جارامدى پاسپورتى بار قازاقستان رەسپۋبليكاسىنىڭ ازاماتتارى ەلىمىزدىڭ ديپلوماتيالىق نەمەسە كونسۋلدىق وكىلدىگىنە جۇگىنە الادى»، - دەدى رەسمي وكىل ۆەدومستۆودا وتكەن اپتالىق بريفينگى بارىسىندا.
ونىڭ ايتۋىنشا، شەتەلدەگى سايلاۋ پروسەسىن ۋاقىتىلى جانە تولىقتاي دايىنداۋ ماقساتىندا قازاقستان ازاماتتارى جاقىن ماڭداعى سايلاۋ ۋچاسكەسىنە الدىن الا حابارلاسىپ، سايلاۋشىلار تىزىمىنە ەنگىزۋ ءۇشىن مالىمەت بەرۋى كەرەك.
«ۋچاسكەلەردىڭ بايلانىس دەرەكتەرى سىرتقى ىستەر مينيسترلىگىنىڭ رەسمي سايتىندا جاريالانادى»، - دەدى ا. سمادياروۆ.