عىلىمي اينالىمعا ەنگىزۋ ءۇشىن جۇمىس توبى جاساقتالماق
ۇلت ۇستازى احمەت بايتۇرسىن ۇلى مەن «الاش» قوزعالىسىنىڭ باسقا دا كورنەكتى قايراتكەرلەرى تۋرالى شەتەل ارحيۆتەرىندە ساقتالعان دەرەكتەر ىزدەستىرىلىپ جاتىر، دەپ حابارلايدى Almaty-akshamy.kz. بۇل تۋرالى ادىلبەك قابا ءوزىنىڭ Facebook پاراقشاسىندا جازدى. ول دەرەكتەر تابىلعان جاعدايدا ولاردى عىلىمي اينالىمعا ەنگىزۋ ءۇشىن ءتىل ءبىلىمى، ادەبيەت جانە تاريح سالاسى عالىمدارىنان قۇرالعان جۇمىس توبى جاساقتالعانىن حابارلادى.
«ون ادامنان تۇراتىن ەكسپەديسيانىڭ العاشقى لەگى جوسپارعا سايكەس جانە الاشتانۋشى، احمەتتانۋشى عالىمداردىڭ ۇسىنىستارى بويىنشا رەسەيدىڭ ماسكەۋ، سانكت-پەتەربۋرگ قالالارىنداعى، تاتارستاننىڭ قازان قالاسىنداعى مەملەكەتتىك ارحيۆتەرىنە بارىپ، قازاق اعارتۋشىلارىنىڭ ەڭبەكتەرىن ىزدەستىرىپ قايتتى. بۇگىنگى كۇنى بۇل جۇمىستار ورىنبور وبلىسىنىڭ مەملەكەتتىك ءارحيۆى مەن ومبى وبلىسىنىڭ تاريحي ارحيۆىندە جۇرگىزىلۋدە»، - دەدى ادىلبەك قابا.
وعان قوسا الداعى ۋاقىتتا وسى ماقساتپەن تاشكەنت، ترويسك، حەلسينكي قالالارىنداعى ارحيۆتەردى ارالاۋ جوسپارلانعانىن ايتتى. ەگەر بۇرىن ەشبىر جەردە جاريالانباعان تىڭ دەرەكتەر تابىلىپ جاتسا، جوسپارلانعان جيناققا ەنىپ، كوپشىلىك كوزايىمىنا اينالادى.
«جوبا اياسىندا العاشقى ەكى اي تەك قانا ۇيىمداستىرۋشىلىق جۇمىستارعا ارنالسا، قالعان ءتورت اي ىشىندە ارحيۆتەردەن ءتيىستى ماتەريالدار ىزدەستىرۋ، تەحنيكالىق وڭدەۋ، ساراپتاۋ جانە جيناقتى ازىرلەۋ جۇمىستارى جۇرگىزىلمەكشى»، - دەلىنگەن جازبادا.