شەت ەلدە وتاندىق كينوكارتينانىڭ تۇساۋكەسەرى ۇيىمداستىرىلدى

بىشكەكتە «مۇقاعالي» جانە «وت» دەپ اتالاتىن قازاقستاندىق ەكى كينوكارتينانىڭ تۇساۋكەسەرى بولدى

پرەمەرا قازاق كينوسى كۇنى اياسىندا ءوتتى، دەپ حابارلايدى Almaty-akshamy.kz 24.kz-كە سىلتەمە جاساپ.

وتاندىق تۋىندىلاردى شەتەلدە كورسەتۋ مارافونى بيىل 15 ەلدى قامتيدى. ءبىراق ەڭ العاش بولىپ، ءدال وسى قىرعىز ەلىنىڭ استاناسىنان باستاۋ الدى. قازاق كينوسىن قىرعىز حالقى ءسۇيىپ كورەدى.

سوندىقتان جەرگىلىكتى كورەرمەن نازارىنا بۇل جولى دا بىر-بىرىنە مۇلدە ۇقسامايتىن، بىرەگەي كارتينالار ۇسىنىلدى. سونىڭ ءبىرى رەجيسسەر بولات قالىمبەتوۆ تۇسىرگەن «مۇقاعالي» ءفيلمى.

دراما جانرىنداعى بۇل تۋىندى كورەرمەندى تەك اقىننىڭ شىعارماشىلىعىمەن عانا تانىستىرىپ قويمايدى. سونىمەن قاتار ءمۇقاعاليدىڭ ىشكى جان دۇنيەسى، ءومىرى جايلى سىر شەرتەدى. 

«ەندى بۇل قازاقتىڭ ۇلى اقىنى. مۇقاعالي ماقاتايەۆتىڭ 90 جىلدىعىنا ارنالعان بولاتىن. ۇلكەن ءبىر...مۇندا مەن ايتا كەتەيىن بۇل ەندى اقىن تۋرالى ەمەس، اقىننىڭ تاعدىرى تۋرالى، اقىننىڭ ءومىر سۇرگەن ورتاسى تۋرالى، سول عاسىر تۋرالى. نەگە مۇقاعالي ماقاتايەۆ 45 جاسىندا ەرتە ومىردەن كەتتى دەگەن سۇراقتارعا جاۋاپ ىزدەۋگە تىرىستىق»، - دەدى فيلم رەجيسسورى بولات قالىمبەتوۆ.