ەندى مۇگەدەكتىك تاعايىنداۋ تۋرالى شەشىمدى تاۋەلسىز ساراپشىلار قابىلدايدى
مۇگەدەكتىكتى سىرتتاي بەلگىلەۋ جوباسى الماتىدا بىلتىر قاراشا ايىندا ىسكە قوسىلدى. 12 اۋرۋ بويىنشا سىرتتاي كۋالاندىرۋ قىزمەتىن ازاماتتار ەلدىڭ باسقا وڭىرلەرىندە دە پايدالانا الادى. بۇل تۋرالى بريفينگ بارىسىندا الماتى قالاسى بويىنشا ەڭبەك، الەۋمەتتىك قورعاۋ جانە كوشى-قون دەپارتامەنتى باسشىسىنىڭ ورىنباسارى گۇلنار قۇسمانوۆا ايتتى، دەپ حابارلايدى اlmaty-akshamy.kz.
سپيكەردىڭ سوزىنشە، الماتىدا ەرەكشە قاجەتتىلىگى بار ادامدارعا مەديسينالىق-الەۋمەتتىك ساراپتاما بولىمىنە بارۋدىڭ قاجەتى جوق.
ەندى مۇگەدەكتىك تاعايىنداۋ تۋرالى شەشىمدى تاۋەلسىز ساراپشىلار قابىلدايدى.
«ەرەكشە قاجەتتىلىگى بار ادامدارعا ەندى مەملەكەتتىك قۇرىلىمدارعا بارۋدىڭ، قۇجاتتار پاكەتىن جيناۋدىڭ قاجەتى جوق. مەدۇيىمدار مەن مەديسينالىق-الەۋمەتتىك ساراپتاما بولىمشەلەرى اراسىندا ەلەكتروندى قۇجات اينالىمى قامتاماسىز ەتىلگەن، بۇل مەرزىمدى ايتارلىقتاي قىسقارتۋعا كومەكتەسەدى، مۇگەدەكتەردى ارتىق انىقتامالاردان قۇتقارادى جانە ولارعا ەلەكتروندى تۇردە جۇگىنۋگە جانە ناتيجە الۋعا مۇمكىندىك بەرەدى»، - دەدى ول.
الماتىدا پيلوتتىق جوبا وتكەن جىلدىڭ قاراشا ايىندا 12 اۋرۋ بويىنشا ىسكە قوسىلدى. بۇل رەتتە سىرتتاي كۋالاندىرۋ قىزمەتىن ەلدىڭ باسقا وڭىرلەرىندە دە پايدالانا الادى.
«ءبىرىنشى ايدا جوباعا جەتى مەديسينالىق ۇيىم قوسىلدى. بۇگىنگى تاڭدا بىزبەن 39 مەملەكەتتىك مەديسينالىق ۇيىم جانە 31 جەكە مەديسينالىق ورتالىق جۇمىس ىستەيدى. سونىمەن قاتار، 1 ناۋرىزداعى جاعدايعا سايكەس رەسپۋبليكا بويىنشا سىرتتاي كۋالاندىرۋعا 19 546 ءوتىنىم جىبەرىلدى. 2022 جىلدىڭ باسىنان بەرى الماتىدا مۇگەدەكتىكتى سىرتتاي بەلگىلەۋ قىزمەتىن 2 515 ادام الدى»، - دەدى الماتى قالاسى بويىنشا ەڭبەك، الەۋمەتتىك قورعاۋ جانە كوشى-قون دەپارتامەنتى باسشىسىنىڭ ورىنباسارى.
گۇلنار قۇسمانوۆا بولاشاقتا سىرتتاي كۋالاندىرۋدان وتۋگە بولاتىن اۋرۋلار ءتىزىمى كەڭەيتىلەتىنىن اتاپ ءوتتى.