شەرحان مۇرتازا تۇرعان اۋىلداعى ءۇي مۋزەيگە اينالادى

بۇدان بولەك وڭىردەگى ءتورت مەكتەپ قابىرعالى قالامگەردىڭ ەسىمىن ەنشىلەگەن

حالىق جازۋشىسى شەرحان مۇرتازانىڭ جۋالى اۋدانى تالاپتى اۋىلىندا تۇرعان ءۇيى مۋزەيگە اينالادى. بۇل تۋرالى ءماسليحات دەپۋتاتتارىمەن كەزدەسۋىندە جامبىل وبلىسىنىڭ اكىمى نۇرجان نۇرجىگىتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

كەزدەسۋدە حالىق قالاۋلىلارى ءبىرقاتار ماسەلەنى كوتەرىپ، وي-ۇسىنىستارىن جەتكىزدى.

ەربولات ساۋرىقوۆ اۋىر جۇك كولىكتەرىنىڭ شامادان تىس جۇكتەمەسىنىڭ سالدارىنان جولداردىڭ ءبۇلىنىپ جاتقاندىعىن، حالىق جازۋشىسى شەرحان مۇرتازانىڭ 90 جىلدىعىن كەڭ كولەمدە اتاپ ءوتۋ، وبلىس ورتالىعىنان كوشە اتىن بەرۋ سەكىلدى ماسەلەلەردى كوتەردى.

وزگە دە حالىق قالاۋلىلارى الەۋمەتتىك، اۋىل شارۋاشىلىعى، ءبىلىم بەرۋ سالالارىنداعى ماسەلەلەرگە نازار اۋدارتتى.
وبلىس اكىمى ءماسليحاتتاردىڭ جۇمىسىنىڭ ماڭىزدىلىعىن باسا ايتىپ، كوتەرىلگەن بارلىق ماسەلەلەر مەن ۇسىنىستار ەسكەرىلىپ، قاراستىرىلاتىنىن جەتكىزدى.

سونىڭ ىشىندە شەرحان مۇرتازانىڭ 90 جىلدىق مەرەيتويىن ءتيىستى دەڭگەيدە اتاپ ءوتۋ ءۇشىن قاجەتتى شارالار قابىلدانىپ جاتقانىن، تۇلعانىڭ جۋالىدا ءوزى تۇرعان ۇيىندە مۋزەيى اشىلاتىنىن اتاپ ءوتتى.

بۇدان بولەك وڭىردەگى ءتورت مەكتەپ قابىرعالى قالامگەردىڭ ەسىمىن ەنشىلەگەن. ءبىرتۋار تۇلعانىڭ ەسكەرتكىشىن سالۋ ماسەلەسى دە قارالۋدا.
جالپى، ۇكىمەتتىڭ قاۋلىسىمەن جامبىل وبلىسىنداعى 43 مەكتەپكە ءاليحان بوكەيحان، احمەت بايتۇرسىن ۇلى، ساكەن سەيفۋللين، ورالحان بوكەي، ماعجان جۇمابايەۆ، ءمىرجاقىپ دۋلاتوۆ، وراز جاندوسوۆ، قانىش ساتپايەۆ، مۇحتار اۋەزوۆ، دىنمۇحامەد قونايەۆ، اسانباي اسقاروۆ، شەرحان مۇرتازا سياقتى الاش جانە قوعام قايراتكەرلەرى، عالىمدار، جازۋشىلار مەن باسقا دا تاريحي تۇلعالاردىڭ ەسىمدەرى بەرىلگەن.

ايتا كەتەيىك، وسىعان دەيىن، تارازدا شەرحان مۇرتازا تۇرعان ۇيگە ەسكەرتكىش-تاقتا ورناتىلعانىن جازعان بولاتىنبىز.