ق ر پارلامەنتى ءماجىلىسىنىڭ دەپۋتاتى ولجاس قۇسپەكوۆ وڭىرلەرگە جاساعان ساپارى بارىسىندا ۇقك شەكارا قىزمەتى الماتى وبلىسى بويىنشا دەپارتامەنتىنىڭ قاراساي اۋدانى شەكارا باسقارماسىندا بولدى.
حالىق قالاۋلىسىن دەپارتامەنت باستىعى، پولكوۆنيك الىبەك قايۋپوۆ قارسى الىپ، ارنايى ماقساتتاعى ۇتقىر ءىس-قيمىلدار توبىنىڭ جۇمىسىمەن تانىستىردى. ەل شەبىندە كۇردەلى تاپسىرمالاردى ورىنداۋ ءۇشىن جاساقتالعان توپتىڭ زاماناۋي ۇلگىدەگى كيىمدەرى مەن قارۋ-جاراقتارى دەپۋتاتتىڭ نازارىنان تىس قالمادى. بۇدان كەيىن دەپۋتات تەحنيكالىق جانە كاسىبي دايارلىق ءبولىمىنىڭ كازارماسى مەن وقۋ-وندىرىستىك زەرتحاناسىن ارالاپ كوردى.
دەپارتامەنت باستىعى الىبەك قايۋپوۆ دەپۋتاتقا شەكارا قىزمەتىنىڭ بولىمشەلەرىنە قاجەت ماماندىق تۇرلەرىن دايارلاۋ كەزىندە كەزدەسەتىن ماسەلەلەردى جەتكىزدى. كەزدەسۋ بارىسىندا شەكارا باسقارماسىنىڭ جىلۋ قازاندىعىن قايتا جاڭعىرتۋ، شەكارا اۋماعىن سۋمەن قامتۋ جانە كارىز جۇيەسىنە قاتىستى ماسەلەلەر قوزعالدى. سونىمەن بىرگە، وزدەرىنىڭ وتان الدىنداعى بورىشىن تۋعان ەلىنىڭ شەكاراسىندا وتەگەن ساربازداردىڭ اسكەردەن كەيىن جۇمىسقا ورنالاسۋ مۇمكىندىگى دە ءسوز بولدى.
شەكارا باسقارمالارىنىڭ وقۋ بازاسىندا جاس جاۋىنگەرلەر كۋرسىنان وتكەن ساربازدارعا ماماندىق العانىن ايعاقتايتىن سەرتيفيكات بەرىلەدى. الايدا، بۇل قۇجات سارباز اسكەردەن ورالعان سوڭ ءوزىنىڭ كۇشىن جوعالتادى. پولكوۆنيك الىبەك قايۋپوۆ بۇل ماسەلەنى دەپۋتاتپەن بىرگە تالقىلادى.
– مەملەكەت اسكەري قىزمەتشىلەردىڭ قىزمەتىن جاقسارتۋ ءۇشىن قولدان كەلگەننىڭ بارلىعىن جاساۋعا ءتيىس. زاماناۋي تەحنيكالارمەن قامتاماسىز ەتۋمەن بىرگە تۇرمىستىق ماسەلەلەر دە نازاردان تىس قالماۋى كەرەك. شەكارادا ساپالى جانە ءقاۋىپسىز قىزمەت اتقارۋ ءۇشىن بارلىق جاعداي بولۋى قاجەت، – دەپ اتاپ ءوتتى ولجاس قۇسپەكوۆ.
شەكارامىزدىڭ تىنىشتىعىن كۇزەتىپ جۇرگەن شەكاراشىلاردىڭ الەۋمەتتىك-تۇرمىستىق جاعدايى سىن كوتەرمەيتىنىن بۇعان دەيىن دە دەپۋتاتتار تالاي رەت كوتەرگەن ەدى. اسىرەسە، شىلىڭگىر شىلدە مەن قاقاعان قاڭتاردا جۇمىس ىستەيتىن شەكاراشىلاردىڭ جاعدايىن جاقسارتۋ باعىتىندا ناقتى قادامدار جاسالۋى قاجەت.