تاۋ ەتەگىندەگى بالالاردىڭ دۋماندى مەكەنى- وقۋشىلار سارايىندا اتا-اناسىنىڭ قامقورلىعىنسىز قالعان 170 بالا تاڭعادجايىپقا تولى شىرشا مەرەكەسىنىڭ قوناعى بولدى. ءداستۇرلى جاڭا جىلدىق شىرشا مەرەكەسىن بيىل الماتى قالاسى اكىمدىگى، قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى، "IMEI" حالىقارالىق اقىل-وي ءبىلىم بەرۋ ورتالىعىمەن بىرلەسىپ ۇيىمداستىرىپ وتىر.
الدىمەن بالاقايلاردى ءتۇرلى ەرتەگى كەيىپكەرلەرى قارسى الىپ، ۇلكەن زالعا باستادى. وسىناۋ ساتتە، ناعىز كەرەمەت باستالدى! وقۋشىلار سارايىنىڭ سالتانات زالى ناعىز قۋانىش پەن ادام سەنبەس سيقىر الەمىنە اينالعانداي.
ەرتەگى كەيىپكەرلەرىنىڭ بارلىعى وسىندا جينالعان. ورتاداعى الىپ شىرشا ماڭىنا جينالعان بالالار دا وسىناۋ عاجايىپقا سەنەر-سەنبەسىن بىلمەي ءبىراز تۇرىپ، قىزىقتى ويىنعا كىرىسىپ كەتتى. ويتكەنى، ولاردى قىزىقتى ينتەراكتيۆتەر، كوڭىلدى ويىندار، ادەمى بي مەن ءتۇرلى سىيلىقتار كۇتىپ تۇردى. شىرشا قوناقتارىن قالالىق ءبىلىم باسقارماسى باسشىسىنىڭ ورىنباسارى بيبىگۇل تولەپبەرگەن قىزى قۇتتىقتاپ، تابىسقا جەتۋگە شاقىردى.
كەلەسى ساتتە بالالار وقۋشىلار سارايىنىڭ شىعارماشىلىق ۇجىمى ۇسىنعان كونسەرتتىك باعدارلامانى تاماشالاپ، ءتۇرلى ەرتەگى كەيىپكەرلەرىمەن كەزدەستى.
-جاڭا جىل بالالاردىڭ ەڭ جاقسى كورەتىن مەرەكەسى. ويتكەنى، بۇل مەرەكە شاتتىق پەن قۋانىشقا تولى. سوندىقتان بالالار ونى جىل بويى توسادى. بيىل وسىناۋ سيقىرلى مەرەكەنى وقۋشىلار سارايىنىڭ ۇجىمى ۇيىمداستىرىپ، وعان بىرنەشە سەرىكتەسىمىز قولداۋ كورسەتىپ وتىر. قايىرىمدىلىق تانىتىپ، كومەك كورسەتكەن سەرىكتەستەرىمىز "IMEI" حالىقارالىق اقىل-وي ءبىلىم بەرۋ ورتالىعىنا، وقۋشىلار سارايىنىڭ شىعارماشىلىق ۇجىمىنا، قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنە جانە قازاقستاننىڭ اۆتوموبيل تاسىمالداۋشىلارى مەن ەكسپەديتورلار وداعىنا شىن جۇرەكتەن العىسىمىزدى بىلدىرەمىز وسىنداي جۇرەگى جومارت جانداردىڭ ارقاسىندا بۇل كۇن بالالار ءۇشىن شىن مانىندە ەرتەگى بولدى. الداعى 2025 جىلى ەل ۇكىمەتى بالالار ۇيىندە تاربيەلەنىپ جاتقان بالالاردى پاتروناتتىق وتباسىلاردىڭ تاربيەلەپ الۋى ءۇشىن زاڭدى ەرەجەلەردى جەڭىلدەتۋدى جوسپارلاپ وتىر. بۇل ارينە، وڭ قادام بولار ەدى، -دەيدى قوعامدىق كەڭەستىڭ مۇشەسى، بەلسەندى جاس رافاەل گاسانوۆ.
شىرشا مەرەكەسىنىڭ سوڭىندا سەرىكتەستەر ءاربىر بالاعا ءتاتتى تورتتاردى سىيعا تارتىپ، اياز اتالار شىعارىپ سالدى.