دەنساۋلىعى مىقتى ادامداردىڭ شاشى ەرتە اعارا قويمايدى.
شاشقا اقتىڭ ەرتەرەك ءتۇسۋى كوبىنەسە پيگمەنتاسيا دەنساۋلىعى سىر بەرگەنىن اڭعارتادى، – دەيدى دەرماتوۆەنەرولوگ، تريحولوگ دەنيس باربينوۆ "دوكتور پيتەر" پورتالىنا بەرگەن سۇحباتىندا. كەيدە اتا-انا العاشقى اق شاشتى بالادا دا كورىپ قالۋى مۇمكىن. ءبىراق بۇل وتە سيرەك جاعداي، كوبىنەسە 30-40 جاستا شاشقا اق تۇسەدى. كوپتەگەن جىلدار بويى عالىمدار بۇل نەمەن بايلانىستى ەكەنىن انىقتاۋعا تىرىستى، دەپ حابارلايدى aqshamnews.kz.
ناقتى جاۋاپ بەرۋ ءالى دە قيىن، ءبىراق شاشقا ەرتە اق ءتۇسۋى تۇقىمقۋالاۋشىلىق بولماسا، تريحولوگقا بارعان ءجون.
ءبىزدىڭ شاشىمىزعا مەلانوسيت جاسۋشالارى شىعاراتىن مەلاتونين ءتۇس بەرەدى. پيگمەنت ازايعان كەزدە شاش بىرتىندەپ تۇسسىزدەنە باستايدى. ەگدە جاستاعى ادامداردا اق شاش مەلانوسيتتەردىڭ تابيعي قارتايۋىنان بولادى، ال جاس ادامداردا ءارتۇرلى جاعدايلارعا بايلانىستى جاسۋشا بەلسەندىلىگى تومەندەيدى.
تۇقىمقۋالاۋشىلىق
شاش 25 جاسقا دەيىن اعارسا، ەرتە بولىپ سانالادى. گەنەتيكا مەن اق شاشتىڭ بايلانىسىن قازىرگى عىلىمي زەرتتەۋلەر راستايدى. ۇلىبريتانيا عالىمدارى مەلانين وندىرۋگە قاتىساتىن ارنايى IRF4 گەنىن تاپتى.
گورمونالدى اق شاش
ەندوكريندىك جۇيە، ەڭ الدىمەن قالقانشا بەزى دە مەلانوسيت جاسۋشالارىنىڭ جۇمىسىن رەتتەيدى. سوندىقتان قالقانشا بەزىنىڭ كەز كەلگەن بۇزىلۋى مەلانين دەڭگەيىنىڭ تومەندەۋىنە جانە شاش پيگمەنتاسياسىنىڭ جوعالۋىنا اكەلۋى مۇمكىن. قالقانشا بەزىنىڭ گورموندارىن باعالاۋ كەرەك.
اۋتويممۋندى اۋرۋلار
شاشتىڭ ەرتە اعارۋى اۋتويممۋندى اۋرۋ سالدارى بولۋى مۇمكىن. مىسالى، سەلياكيي اۋرۋى – گليۋتەنگە توزبەۋشىلىك. مەلانيننىڭ جەتىسپەۋشىلىگى سونىمەن قاتار ادامداردا "تاز داقتار" پايدا بولاتىن الوپەسيامەن قاتار جۇرەدى. شاش قايتا وسسە دە، ءتۇسىن ساقتاۋ قيىنداۋ.
اۋىر دەرت
ەرتە اق شاش كوبىنەسە ۆيتيليگو – تەرى پيگمەنتاسياسىنىڭ بۇزىلۋى بار ناۋقاستاردا بايقالادى. نەيروفيبروماتوز – ىسىكتەردىڭ دامۋىمەن جانە تەرىدە قوڭىر داقتاردىڭ پايدا بولۋىمەن قاتار جۇرەتىن تۇقىم قۋالايتىن اۋرۋ.