قاراعاندى وبلىسىندا شارۋا قوجالىق يەسىن سان سوقتىرعان الاياق ۇستالدى.
قاراعاندى وبلىسى، شەت اۋداندىق پوليسيا بولىمىنە 60 جاستاعى شارۋا قوجالىقتىڭ يەسى ارىزبەن شاعىمداندى. ول ءتارتىپ ساقشىلارىنا الاياقتىڭ قۇربانى بولعانى تۋرالى حابارلادى.
بەلگىلى بولعانداي بىلتىرعى جىلدىڭ تامىز ايىندا قوجالىقتىڭ جايىلىمى ورنالاسقان جەرگە مال ساتىپ الاتىن ادام كەلگەن. بەلگىسىز ادام قوجالىق يەسىنە كوتەرمە باعامەن مال الاتىنى جونىندە قۇجاتتار كورسەتىپ، جابىرلەنۋشىدەن 40 باس جىلقى العان.
الايدا، ساتىپ الۋشى قولما-قول اقشاسىنىڭ جوق ەكەنىن ايتىپ، العان جىلقىنى ساتقان سوڭ اقشا بەرۋگە كەلىسكەن. سوندىقتاندا ساتىپ الۋشىنىڭ سوزىنە سەنگەن قوجالىق يەسى جىلقىلارىن سالىپ بەرگەن.
ارادا جارتى جىل ۋاقىت وتسە دە جابىرلەنۋشى مالدىڭ اقشاسىن الا الماي سان سوعىپ قالعان. وعان كەلتىرىلگەن شىعىن كولەمى 12 ميلليون تەڭگەنى قۇرادى. پوليسيا قىزمەتكەرلەرىمەن جۇرگىزىلگەن كەشەندى جۇمىستار بارىسىندا وسى ىسكە قاتىسى بار دەگەن كۇدىكپەن 37 جاستاعى استانا قالاسىنىڭ تۇرعىنى ۇستالدى. ول قىلمىسى تۋرالى مويىنداۋ كورسەتپە بەلگىلەرىن بەرىپ، ايعاق زاتتار تاركىلەندى.
اتالعان دەرەك بويىنشا قىلمىستىق ءىس قوزعالدى. قازىرگى ۋاقىتتا ءتارتىپ ساقشىلارىمەن كۇدىكتىنىڭ وسىعان ۇقساس قىلمىستارعا قاتىستىلىعى تەكسەرىلۋدە.