قازاقستان ءۇشىن مەملەكەتارالىق دەڭگەيدە بەكىتىلگەن ليميتتەر مەن ترانسشەكارالىق سۋ نىساندارى جۇمىسىنىڭ بولجامدى رەجيمى تۇركىستان، قىزىلوردا جانە جامبىل وبلىستارىنىڭ ەگىنشىلەرىن ماۋسىمدا ەگىندىك سۋمەن ىسىراپسىز قامتاماسىز ەتۋگە باعىتتالعان.
وزبەكستان تاراپىمەن قول جەتكىزىلگەن ۋاعدالاستىقتارعا سايكەس شاردارا سۋ قويماسىنىڭ تولۋ كورسەتكىشى بيىل 300 ملن م3-كە ۇلعايتىلدى جانە 4،8 كم3 دەڭگەيىندە قالدى، مامىر ايىنداعى ورتاشا سۋ اعىنى 350 م3/س (2023 جىلى 90 م3/س) قۇرادى، دەپ حابارلايدى Almaty-akshamy.kz ق ر پرەمەر-مينيسترىنىڭ رەسمي اقپاراتتىق رەسۋرسىنا سىلتەمە جاساپ.
شاردارا سۋ قويماسىنا ءساۋىر-مامىر ايلارىندا بارلىعى 1،4 كم3 سۋ قۇيىلدى، بۇل وتكەن جىلدىڭ سايكەس كەزەڭىمەن سالىستىرعاندا 2 ەسەگە ارتىق.
«دوستىق» كانالىنىڭ قازاقستاندىق بولىگىنە سۋ بەرۋ ءليميتى 922 ملن م3 كولەمىندە بەلگىلەنگەن.
قازاقستان، تاجىكستان جانە وزبەكستان اراسىندا «باحري توچيك» سۋ قويماسىنىڭ بيىلعى شىلدە-تامىز ايلارىنا ارنالعان جۇمىس رەجيمى كەستەسىنە قول قويۋ پىسىقتالىپ جاتىر، بۇل اتالعان ەكى نىسانعا كەپىلدى سۋ بەرۋدى قامتاماسىز ەتۋگە مۇمكىندىك بەرەدى.
قىرعىزستان رەسپۋبليكاسىنىڭ (كيروۆ، ورتو-توكوي) سۋ قويمالارىنىڭ گيدرولوگيالىق بولجامدارى مەن قازىرگى تولۋ كورسەتكىشىن ەسكەرە وتىرىپ، قازاقستان ءۇشىن تالاس وزەنى ارقىلى 380 ملن م3 كولەمىندە سۋ بەرۋ بەكىتىلدى، بۇل وتكەن جىلعى دەڭگەيدەن 44 ملن م3 ارتىق.
بيىل شۋ وزەنىنەن ءبىزدىڭ ەلىمىزگە 180 ملن م3 كولەم سۋ الۋ كوزدەلگەن، بۇل 2023 جىلعى كورسەتكىشتەن 26 ملن م3 ارتىق.
قازاقستانداعى سۋارمالى جەردىڭ جالپى اۋدانى بيىل 1،5 ملن گا قۇرايدى، ونىڭ نەگىزگى بولىگى الداعى جازدا ىستىق ءارى قۇرعاق اۋا رايى بولجانىپ وتىرعان وڭتۇستىك وڭىرلەرگە تيەسىلى. سۋارۋ جۇمىستارى باستالىپ كەتتى، سۋمەن جابدىقتاۋدىڭ بەكىتىلگەن كولەمى ۆەگەتاسيالىق كەزەڭنىڭ ساپالى ءوتۋىن قامتاماسىز ەتەدى دەپ كۇتىلىپ وتىر.
سۋ تاسقىنى جاعدايىنا بايلانىستى ەلىمىزدىڭ سولتۇستىك، ورتالىق، باتىس جانە ءىشىنارا شىعىس ايماقتارىندا سۋ قويمالارى ورتا ەسەپپەن 70-تەن 90%-عا دەيىن تولتىرىلدى. قازاقستاندا بارلىعى 405 سۋ قويماسى بار، ولاردىڭ تولىق سىيىمدىلىعىنىڭ جيىنتىعى 14 997،9 ملن م3 قۇرايدى. سۋ قويمالارىنداعى بۇل كولەم اۋىل شارۋاشىلىعى مەن ونەركاسىپتە پايدالانىلادى.
رەسپۋبليكانىڭ سۋعا قاجەتتىلىكتەرىن ەسكەرە وتىرىپ، قىزىلوردا، جامبىل، تۇركىستان، باتىس قازاقستان جانە اقمولا وبلىستارىندا جاڭا سۋ قويمالارىن سالۋ جوسپارلانعان. بۇگىندە تۇركىستان وبلىسىندا «بايدىبەك اتا» سۋ قويماسىنىڭ قۇرىلىسى ءجۇرىپ جاتىر.
سۋ قويمالارىن سالۋ بويىنشا ەكى جوبا مەملەكەتتىك ساراپتامانىڭ قاراۋىندا. تاعى بەس نىسان بويىنشا جوبالاۋ-سمەتالىق قۇجاتتاما دايىندالىپ، جاقىن ارادا ساراپتاماعا جىبەرىلەتىن بولادى.