بۇگىن – رەسپۋبليكالىق «ناۋرىزناما» ونكۇندىگىنىڭ 4ء-شى كۇنى. نەگىزگى ۇلكەن زالىنىڭ ورتاسىنا بيىك كوتەرىلگەن شاڭىراق ورناتىلعان ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە ايتۋلى كۇننىڭ قۇرمەتىنە تانىمدىق، تاعىلىمدىق ەكسكۋرسيا ءوتتى.
ءيا، شاڭىراق – قاسيەتتى ۇعىم. اتام قازاق شاڭىراقتىڭ شايقاتىلماي، ۋىقتاردىڭ دۇرىس ءارى تەز شانشىلۋىن جاقسى ىرىمعا بالاعان. ول – وتباسى سيمۆولى. ال ءاربىر وتباسى – مەملەكەتتىڭ ۋىعى.
ەكسكۋرسيانى «مۋزەي پەداگوگيكاسى جانە ەكسكۋرسيا» ءبولىمىنىڭ قىزمەتكەرلەرى شولپان نۇعىمانوۆا مەن گۇلدەناي بەكباۋلييەۆا مۋزەيدىڭ «قازاقستان ساندىك-قولدانبالى ونەرى» جانە «زاماناۋي ساندىك-قولدانبالى ونەرى» تۇراقتى ەكسپوزيسيالارى بويىنشا جۇرگىزدى.
«قازاق مادەنيەتىندە شاڭىراقتىڭ الار ورنى ەرەكشە. ونىڭ تۇرمىس-تىرشىلىكتە سان قىرلى قاسيەتى بار. كۇندەلىكتى تۇرمىستا شاڭىراقتى قازاقتىڭ كيىز ءۇيىنىڭ توبەسىندە ۋىقتاردى بىرىكتىرىپ تۇراتىن ەلەمەنت رەتىندە قاراستىرادى. ءۇي تىككەندە شاڭىراق كوتەرۋدى سول اۋلەتتىڭ بەدەلدى، ابىرويلى ەر-ازاماتىنا تاپسىرعان. ال وتباسىنىڭ باسقا ۇلكەن-كىشىسى بىر-بىرىمەن سەپتەسىپ ۋىقتارىن شانشىعان. بۇل دا سول اۋلەتتىڭ اۋىزبىرشىلىگىن، ىنتىماق-بىرلىگىن، بىر-بىرىنە دەگەن باۋىرمالدىعىن كورسەتسە كەرەك»، – دەيدى ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ «مۋزەي پەداگوگيكاسى جانە ەكسكۋرسيا» ءبولىمىنىڭ قىزمەتكەرى گۇلدەناي بەكباۋلييەۆا.
مۋزەيگە كەلگەن، ۇلتتىق قۇندىلىقتار تۋرالى اسەرلى اڭگىمەلەرگە قۇلاق تۇرگەن "ارىستان" مامانداندىرىلعان ليسەي وقۋشىلارىنا سونداي-اق، ۇلى دالا مادەنيەتىنىڭ جاۋھارىنا اينالعان كيىز ءۇيدىڭ قالاي تىگىلەتىنى، ۋىق، تۋىرلىق، ۇزىك، تۇندىك سىندى بولشەكتەرى، ونىڭ ىشىندەگى ءارقايسىسى ءپالساپالىق مانگە يە سان الۋان تۇرمىستىق بۇيىمدارى جايىندا دا قىزىقتى ءھام تانىمدىق مالىمەتتەر تارقاتىلدى. بۇل اسىرەسە، بۇگىنگى جاس بۋىن - ەرتەڭگى ءبىر-بىر ءۇيدىڭ ەگەسى، وتاعاسىلارى ءۇشىن تاعىلىمدى بولدى.
ەسكە سالا كەتەيىك، ۇلىستىڭ ۇلى كۇنى – ناۋرىز مەرەكەسىن تويلاۋ اياسىندا ەلىمىزدە 14-23 ناۋرىز ارالىعىندا «ناۋرىزناما» ونكۇندىگى جاريالانعان بولاتىن. ءار كۇننىڭ تاعىلىمعا تولى ءوز اتاۋى بار. ال بۇگىن – شاڭىراق كۇنى.