25 قاڭتارعا دەيىن كوميسسيا اتقارىلعان جۇمىس تۋرالى ەسەپ بەرەدى.
الماتى وبلىسىنىڭ قاراساي اۋدانى، شامالعان اۋىلدىق وكرۋگى اكىمدىگىنىڭ عيماراتى الدىنا گاز تاريفىنە نارازىلىق بىلدىرگەن تۇرعىندار جينالدى. اۋىل اكىمدىگى جاعدايعا قاتىستى تۇسىنىكتەمە بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، بۇگىنگى كۇنى اۋىلدا تابيعي گاز ءۇشىن تاريف تەكشە مەترى ءۇشىن 34،75 تەڭگەنى قۇرايدى. سالىستىرمالى تۇردە الساق، قاسكەلەڭ قالاسىنداعى گاز باعاسى تەكشە مەترى ءۇشىن – 26،89 تەڭگە. جەلتوقسان ايىندا گاز تۇتىنۋ ءتاريفى 1،5-2 ەسە قىمباتتاعان.
قاراساي اۋدانى تۇرعىندارىن گازبەن قامتاماسىز ەتىپ وتىرعان كاسىپورىنداردىڭ تاريفتەگى ايىرماشىلىعى تۇرعىنداردىڭ نارازىلىعىن تۋدىردى. ماسەلەن، «الماتىگازسەرۆيس-حولدينگ» اق-دا حالىق ءۇشىن تابيعي گاز ءتاريفى تەكشە مەترىنە 26-27 تەڭگەنى قۇراسا، «سيگما گاز» جشس-دە – 34 تەڭگە 75 تيىن. اتالعان ج ش س قاراساي اۋدانى بويىنشا شامالعان، جاندوسوۆ، شالقار، قايرات، ەڭبەكشى، قۇمارال، ۇشتەرەك جانە اراي، دارحان ساياجايلارىن كوگىلدىر وتىنمەن قامتاماسىز ەتەدى. ابونەنتتەردىڭ جالپى سانى – 9906.
حالىق نارازىلىعىنا قاتىستى تۇسىنىك بەرگەن اۋدان اكىمدىگى تاريفتەر بويىنشا جۇمىس كوميسسياسى قۇرىلاتىنىن ءمالىم ەتتى.
«گاز جەتكىزۋشىسى ءتاريفتى ەنەرگەتيكا مينيسترلىگىنىڭ №172 «ق ر ىشكى نارىعىندا تاۋارلىق گازدى كوتەرمە ساۋدادا وتكىزۋدىڭ شەكتى باعالارىن بەكىتۋ تۋرالى» بۇيرىعىنا نەگىزدەلە وتىرىپ كوتەردى. بۇل رەتتە مونوپولياعا قارسى ۆەدومستۆومەن كەلىسىم تەك تاسىمالداۋ ءۇشىن الىندى. وسى فاكتىنى ەسكەرە وتىرىپ، تۇرعىندارمەن جيىن بارىسىندا اۋدان اكىمدىگى، اۋدان پروكۋراتۋراسى، الماتى وبلىسى بويىنشا تابيعي مونوپوليالار دەپارتامەنتى جانە «سيگما گاز» ج ش س ءتاريفىنىڭ جانە قوسىلۋ تاريفتەرىنىڭ قالىپتاسۋىن تەكسەرۋ بويىنشا قوعامدىق وكىلدەردەن تۇراتىن جۇمىس كوميسسياسىن قۇرۋ تۋرالى شەشىم قابىلداندى. 25 قاڭتارعا دەيىن كوميسسيا اتقارىلعان جۇمىس تۋرالى ەسەپ بەرەدى»، - دەپ حابارلادى اۋدان اكىمدىگىنەن.