ادام كۇندەلىكتى راسيونىنا ءدامدى تاعامداردى قوسۋعا تىرىسادى: قۇنارلى سورپالار، ىستالعان جانە مايلى ەت، مارينادتار، تۇزدى بالىق، ءسۇت ونىمدەرى، تورتتار جانە ت.ب. ءبىزدىڭ اعزامىز ومىرلىك قۋات الۋ ءۇشىن وسىنىڭ ءبارىن قورىتۋعا دايىن. ءبىراق بارلىعىن بىردەي تۇتىنۋ دۇرىس پا؟
ادامنىڭ تاماقتانۋى مەن اۋرۋلارى اراسىنداعى تىكەلەي بايلانىس عىلىمي تۇردە دالەلدەنگەن. جۇرەك-قان تامىرلارى اۋرۋلارى الەمنىڭ كوپتەگەن ەلىندە، سونىڭ ىشىندە قازاقستاندا دا، ءولىم-جىتىمنىڭ باستى سەبەپتەرىنىڭ ءبىرى بولىپ تابىلادى.
جۇرەك – اعزاداعى ۇزدىكسىز جۇمىس ىستەيتىن جانە قاندى ايداي وتىرىپ، بۇكىل دەنەنى قورەكتىك زاتتار مەن وتتەگىمەن قامتاماسىز ەتەتىن جالعىز بۇلشىقەت. ادامنىڭ ۇزاق ءومىر ءسۇرۋى مەن جۇمىسقا قابىلەتتىلىگىن بارىنشا ۇزاق ساقتاي الۋى ءۇشىن جۇرەك-قان تامىرلارى جۇيەسىنىڭ ءتۇرلى اۋرۋلارىن ەرتە انىقتاۋ ماڭىزدى. سونىمەن قاتار، سالاۋاتتى ءومىر سالتى مەن دۇرىس تاماقتانۋ ادەتتەرى ارقىلى اۋرۋدىڭ الدىن الۋ قاجەت.
كارديولوگ كەڭەسى:
«دۇرىس تاماقتانۋ – جۇرەك-قان تامىرلارى اۋرۋلارىنىڭ ءقاۋپىن ازايتۋدىڭ اجىراماس بولىگى. شامادان تىس تاماقتانۋ اسقازاندى تولتىرىپ، ديافراگمانى باسىپ، جۇرەكتىڭ جۇمىسىن قيىنداتادى. شامادان تىس مولشەردە ىشكەن سۇيىقتىق تا قوسىمشا جۇكتەمە تۋدىرادى»، – دەيدى كارديولوگيا جانە ىشكى اۋرۋلار عزي كارديولوگيا جانە وڭالتۋ بولىمشەسىنىڭ كارديولوگ دارىگەرى تالشىن قاليولدايەۆا.
جۇرەك-قان تامىرلارى اۋرۋلارى كەزىندە تاماقتانۋ ادەتتەرىندەگى ءقاۋىپ فاكتورلارى مىنالار:
- جەمىستەردى، كوكونىستەر مەن جيدەكتەردى از تۇتىنۋ؛
- تۇز بەن قانىققان ماي قىشقىلدارىن شامادان تىس تۇتىنۋ؛
- تاعامدا تالشىقتىڭ جەتىسپەۋى؛
- دۇرىس تاماقتانباۋعا بايلانىستى ارتىق سالماقتىڭ پايدا بولۋى.
«تاعامداعى قورەكتىك زاتتاردىڭ دۇرىس اراقاتىناسىن ساقتاۋ جانە ءارتۇرلى تاعامداردى پايدالانۋ وتە ماڭىزدى. دۇرىس تاماقتانۋ جۇرەك-قان تامىرلارى اۋرۋلارىنىڭ ءقاۋپىن ازايتىپ قانا قويماي، ولاردى ەمدەۋدە دە ماڭىزدى ءرول اتقارادى»، – دەپ تۇسىندىرەدى دارىگەر.
جۇرەك-قان تامىرلارى اۋرۋلارىن باقىلاۋدا ۇستاۋ ءۇشىن ءوز راسيونىڭىزدى قاداعالاپ، پايدالى تاعامدارعا باسىمدىق بەرۋ قاجەت.
زياندى تاعامداردان اۋلاق بولىپ، سالاۋاتتى تاماقتانۋ ارقىلى دەنساۋلىعىڭىزدى ساقتاڭىز.