شاحمات ويىندارىنىڭ ۋاقىتىن باقىلاۋ ماسەلەسى ويىننىڭ تانىمالدىلىعىنىڭ ارتۋىمەن بارعان سايىن ماڭىزدى بولا ءتۇستى. XIX عاسىردىڭ ورتاسىنا دەيىن شاحمات پارتيالارى ۋاقىتپەن شەكتەلمەگەندىكتەن، ويىندار ساعاتتاپ، ءتىپتى تاۋلىكتەپ سوزىلاتىن. 1843 جىلى 66 ءجۇرىس جاساعان ءبىر پارتيا 14،5 ساعاتقا سوزىلعان. ال 1851 جىلى لوندوندا وتكەن العاشقى حالىقارالىق ماچتا ءبىر پارتيا بارىسىندا ەكى قارسىلاس تا ۇيىقتاپ قالعان، دەپ حابارلايدى aqshamnews.kz.
ۋاقىتتى باقىلاۋ ءۇشىن بىرنەشە ارەكەتتەر جاسالدى. ويىنشىلاردىڭ جالپى ۋاقىتىن 3 ساعاتپەن شەكتەۋ، ءاربىر جۇرىسكە 10 مينۋت بەرۋ جانە ونى اسىپ كەتكەن جاعدايدا ايىپپۇل سالۋ ۇسىنىلدى. باستاپقىدا ۋاقىتتى باقىلاۋ ءۇشىن قۇمساعاتتار قولدانىلدى، ال ويىنشىلاردا كومەكشىلەر بولدى.
XIX عاسىردىڭ سوڭىندا شاحماتشى اۋەسقوي توماس برايت ۋيلسون العاشقى شاحمات ساعاتىن جاسادى. بۇل ماياتنيكتى مەحانيزم ەدى: ەكى بىردەي ساعات رەلسكە بەكىتىلگەن. ۋاقىتتى قارسىلاسقا بەرۋ ءۇشىن ويىنشى ءوز ساعاتىن ەڭكەيتۋى كەرەك بولاتىن، سول كەزدە ونىڭ ساعاتى توقتاپ، قارسىلاسىنىڭ ساعاتى جۇمىس ىستەي باستايتىن.
قىزىعى، بۇل ونەرتابىسقا ونەركاسىپتىك ءوندىرىس بويىنشا پاتەنتتى Amandus Schierwater العان، جانە 1886 جىلى ساعاتتار ساتىلىمعا شىعارىلدى.
1899 جىلى سيفەربلاتتا قىزىل ءتۇستى "جالاۋ" پايدا بولدى، ول سوڭعى 3-10 مينۋتتى كورسەتىپ تۇردى. ال 1900 جىلى تۇيمەلى ساعاتتار جاسالدى، ولار كلاسسيكالىق تۇرگە اينالدى. كەيىن ەلەكتر قۋاتىنىڭ پايدا بولۋىمەن ساعاتتار جەتىلدىرىلدى، ءبىراق ولاردىڭ نەگىزى ءالى كۇنگە دەيىن توماس ۋيلسوننىڭ كلاسسيكاسىنا سۇيەنەدى.