الماتىدا وتكەن تاۋىلىكتە 14 قىلمىس بولدى
بۇل تۋرالى «الماتى» تەلەارناسىنىڭ تىكەلەي ەفيرىندە قالالىق پوليسيا دەپارتامەنتىنىڭ باستىعى قانات تايمەردەنوۆ ايتتى، دەپ حابارلايدى Almaty-akshamy.kz Almaty.tv-عا سىلتەمە جاساپ
«وتكەن تاۋلىكتە قالامىزدا 14 قىلمىس بولدى. ونىڭ ءبارى ءىزى سۋىلماي اشىلدى. پوليسيا جاساقتارى الاتاۋ جانە مەدەۋ اۋداندارىندا پروفيلاكتيكالىق جانە ىزدەستىرۋ شارالارىن وتكىزدى»، - دەيدى قانات تايمەردەنوۆ.
ونىڭ ايتۋىنشا، قالادا ساقتىق شارالارى بارىنشا قولعا الىندى.
«قوعامدىق ءتارتىپتى قامتاماسىز ەتۋگە، ازاماتتاردىڭ قۇقىقتارىن ساقتاۋعا، زاڭدىلىقتى ورناتۋعا ىشكى ىستەر ورگاندارىنىڭ قىزمەتكەرلەرى جانە اسكەري جاساقتار جۇمىلدىرىلدى. ساقتىق شارالارى بارىنشا قولعا الىندى»، - دەيدى ول.
ەلدە دۇربەلەڭ تۋدىرىپ، نىسانداردى قيراتىپ، تونادى دەگەن كۇدىكپەن قازىرگى ۋاقىتتا 1 678 ادام ۇستالدى.
زاڭسىز اينالىمنان 36 بىرلىك اتىس قارۋى مەن 1 مىڭ 476 ءوق-دارى تاركىلەنىپ، الماتىنىڭ شەتىندە ورنلالاسقان 5 بلوك-بەكەتتە 38 ادام ۇستالدى.
«102» پۋلتىنە 881 حابارلاما كەلىپ ءتۇستى. كومەنداتۋرانىڭ Call-ورتالىعىنا ازاماتتاردان جەدەل ارەكەت ەتۋدى تالاپ ەتەتىن 136 قوڭىراۋ قابىلداندى. بارلىق حابارلاما وڭدەلدى.
قازاقستان رەسپۋبليكاسىنىڭ «توتەنشە جاعداي تۋرالى» زاڭىنا سايكەس، ورىندالۋى ءتيىس ءبىرقاتار باستى جانە ۋاقىتشا شەكتەۋلەر قاراستىرىلعان.
«وسى ۋاقىتتا جاسالعان قۇقىقبۇزۋشىلىقتار ءۇشىن جاۋاپكەرشىلىك ەداۋىر قاتاڭ بولادى. مەن الماتى قالاسىنىڭ كومەندانتى رەتىندە ازاماتتارعا ساقتىق شارالارى جايلى ۇندەۋ جاسايمىن. اراڭداتۋشىلارعا ەرمەي، تەك رەسمي دەرەككوزدەردەن الىنعان اقپاراتتاردى قولدانىڭىزدار. زاڭ تالاپتارىن قاتاڭ ساقتاپ، قولدانىلىپ جاتقان شارالارعا تۇسىنىستىكپەن قاراۋلارىڭىزدى سۇرايمىن»، - دەيدى قانات تايمەردەنوۆ.
ايتا كەتەيىك، قازاقستان رەسپۋبليكاسىنىڭ پرەزيدەنتىنىڭ جارلىعىمەن الماتىدا كومەندانتتىق ساعات ەنگىزىلدى.