«سەرپىن» باعدارلاماسى: قازاقستاننىڭ وڭتۇستىك وڭىرلەرىندەگى 10 مىڭنان استام وقۋشى كاسىپتىك باعدار بەرۋ جۇمىسىمەن قامتىلدى، - دەپ حابارلايدى aqshamnews.kz.
Kozybayev University قازاقستاننىڭ وڭتۇستىك وڭىرلەرىندەگى 10 000-نان استام وقۋشىنى قامتىعان اۋقىمدى كاسىپتىك باعدار بەرۋ جۇمىستارىن جۇزەگە اسىردى. قىزىلوردا جانە تۇركىستان وبلىستارىندا ۋنيۆەرسيتەت وكىلدەرى شىمكەنت، تۇركىستان، قىزىلوردا قالالارى سەكىلدى ءىرى ەلدى مەكەندەردەن باستاپ شالعاي اۋىلدارعا دەيىنگى 25 ەلدى مەكەندە بولدى.
كەزدەسۋلەر بارىسىندا مەكتەپتەر مەن كوللەدجدەردىڭ ءبىتىرۋشى تۇلەكتەرىنە جوعارى وقۋ ورنىنا ءتۇسۋ ەرەجەلەرى، وقۋ شارتتارى، سونداي-اق ستۋدەنتتىك جاتاقحانالاردا تۇرۋ مۇمكىندىكتەرى تۋرالى جان-جاقتى اقپارات بەرىلدى. ايتا كەتۋ قاجەت، Kozybayev University-دە ەكى زاماناۋي ستۋدەنتتەر ءۇيىنىڭ پايدالانۋعا بەرىلۋىنىڭ ناتيجەسىندە باسقا وڭىرلەردەن كەلگەن ءبىلىم الۋشىلاردى جاتاقحانامەن قامتاماسىز ەتۋ دەڭگەيى 100 پايىزدى قۇرايدى. سونىمەن قاتار ۋنيۆەرسيتەت كامپۋسى جاڭا وقۋ-زەرتحانالىق كورپۋسپەن، زاماناۋي كوۆوركينگ-كەڭىستىكتەرمەن جانە ساپالى ءبىلىم الۋعا قاجەتتى ماتەريالدىق-تەحنيكالىق بازامەن جابدىقتالعان.
تالاپكەرلەر مەن ولاردىڭ اتا-انالارىنا «سەرپىن» باعدارلاماسىنا قاتىسۋ، پەتروپاۆل قالاسىنا قونىس اۋدارۋ، ورنالاستىرۋ جانە بەيىمدەلۋ ماسەلەلەرى بويىنشا كەڭەستەر بەرىلدى.
قازىرگى ۋاقىتتا اتالعان باعىت بويىنشا Kozybayev University-دە 150-دەن استام ستۋدەنت ءبىلىم الادى. 2024 جىلى ۋنيۆەرسيتەت بازاسىندا بارلىق مۇددەلى مەملەكەتتىك ورگانداردى بىرىكتىرەتىن Serpin Qoldau وڭىرلىك جوبالىق ءوفيسى قۇرىلدى. ونىڭ قىزمەتى اياسىندا ءبىلىم الۋشىلاردى كاسىبي باعىتتاۋ، ترەنينگتەر، تىلدىك كۋرستار، پسيحولوگيالىق بەيىمدەلۋ باعدارلامالارى، سونداي-اق مادەني ينتەگراسياعا باعىتتالعان ءىس-شارالار جۇزەگە اسىرىلادى. 3-4 كۋرس ستۋدەنتتەرى دۋالدى وقىتۋعا جىبەرىلىپ، جەكە ەڭبەك شارتىن جاساسۋعا دەيىن سۇيەمەلدەۋ جۇرگىزىلەدى. تۇلەكتەردىڭ جۇمىسپەن قامتىلۋىنا جاردەمدەسۋ ماقساتىندا ۋنيۆەرسيتەت سولتۇستىك قازاقستان وبلىسىنداعى ءىرى جۇمىس بەرۋشىلەرمەن ىنتىماقتاستىق تۋرالى مەموراندۋمدار جاساستى. سونىمەن قاتار ۋنيۆەرسيتەت باعدارلاما تۇلەكتەرىنە جاتاقحانالاردان ۋاقىتشا تۇرعىن ءۇي ۇسىنادى.
وقۋشىلارمەن وتكەن كەزدەسۋلەر بارىسىندا اريزونا ۋنيۆەرسيتەتىمەن بىرلەسىپ جۇزەگە اسىرىلاتىن قوس ديپلومدى ءبىلىم بەرۋ باعدارلامالارىن تانىستىرۋعا ەرەكشە نازار اۋدارىلدى. اتاپ ايتقاندا، باسقارۋداعى اقپاراتتىق جۇيەلەر، بيوتەحنولوگيا، ينكليۋزيۆتى ءبىلىم بەرۋ، بيزنەس جانە مەنەدجمەنت باعىتتارى ۇسىنىلدى.