بوكستان الەم چەمپيوناتىنىڭ كۇمىس جۇلدەگەرى باسپانالى بولدى
پاۆلودار وبلىسىنىڭ اكىمى ءابىلقايىر سقاقوۆ الەمدىك بىرىنشىلىكتە ايماق پەن ەلدىڭ نامىسىن ابىرويمەن قورعاعان سپورتشىنى قۇتتىقتادى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
سەربيا استاناسى - بەلگراد قالاسىندا وتكەن الەم چەمپيوناتىندا سەرىك تەمىرجانوۆ 57 كەلىگە دەيىنگى سالماق دارەجەسىندە قولعاپ ءتۇيىستىردى. جەكپە-جەك جولىندا موڭعوليا، جاپونيا، ءۇندىستان، رەسەي جانە كۋبانىڭ مىقتى سپورتشىلارىن قاپىدا قالدىردى. ال اقتىق سىندا امەريكالىق دجامال حارۆيدەن ايلاسىن اسىرا الماي، كۇمىس مەدال ەنشىلەدى.
ەلگە ورالعان جۇلدەگەردى ايماق باسشىسى ءابىلقايىر سقاقوۆ قابىلداپ، وبلىس ورتالىعىنان پاتەر كىلتىن تابىستادى.
«سەنىڭ بارلىق جەكپە-جەگىڭدى كوردىم. ۇلتتىق قۇرامانىڭ قورجىنىنا سالعان كۇمىس مەدال التىنعا پارا-پار. وسى جەتىستىگىڭمەن وبلىستىڭ بوكس تاريحىندا جاڭا پاراقتى اشتىڭ. بۇل - بوكستان الەم چەمپيوناتتارىندا جەڭىپ العان پاۆلودارلىقتاردىڭ العاشقى مەدالى. جەرلەستەرىمىزدىڭ قاتارىنان العاشقى بولىپ «ق ر بوكستان ەڭبەك سىڭىرگەن سپورت شەبەرى» اتانۋىڭ دا مەرەيىمىزدى اسىردى. جاتتىقتىرۋشىلارىڭمەن بىرگە جاڭا بەلەستەردى باعىندىرىپ، جازعى وليمپيادادا جەڭىسكە جەتەدى دەپ سەنەمىن»، - دەپ ىزگى تىلەگىن ءبىلدىردى ءابىلقايىر سقاقوۆ.
ءوز كەزەگىندە سەرىك تەمىرجانوۆ الداعى ۋاقىتتا كۇمىسىن التىن مەدالعا الماستىرۋ ءۇشىن ايانىپ قالمايتىنىن ايتتى.
«وليمپيادادان كەيىن ءبىز كوپ ەڭبەك ەتتىك جانە الەمدىك تۋرنيردە جاقسى ونەر كورسەتتىك دەپ ويلايمىن. مۇنىمەن توقتاپ قالمايمىن. بولاشاقتا كۇمىس مەدالدى التىنعا اينالدىرعىم كەلەدى. ءبىزدى قولداعان بارلىق جانكۇيەرلەرگە العىس ايتامىن»، - دەدى جۇلدەگەر.
وسى ورايدا سپورتشىنىڭ تالىمگەرى ازامات ماقاجانوۆ سەرىكتىڭ الەم چەمپيوناتىنا بارۋدىڭ ءوزى ەكىتالاي بولعانىن العا تارتتى.
«سەرىك ۇلتتىق قۇراماداعى سپاررينگتەر كەزىندە جاقسى ناتيجە كورسەتىپ، مىقتىلىعىن دالەلدەدى. سول كەزدە بوكس فەدەراسياسىنىڭ ۆيسە-پرەزيدەنتى باقتيار ارتايەۆ "تۋرنيرگە دايىندالىڭدار، ءبىراق سەرىك مىندەتتى تۇردە مەدال الۋى كەرەك" دەدى. بۇل مىندەتتى ابىرويمەن ورىندادىق»، - دەدى جاتتىقتىرۋشى.
ايتا كەتەيىك، سەرىك تەمىرجانوۆ بيىل توكيو وليمپياداسىنا دا قاتىسقان ەدى. وكىنىشكە قاراي، بۇل باسەكەدە مەدالعا قول جەتكىزە المادى.
دەسە دە، سول تۇستا دا وبلىس اكىمدىگى ءىلتيپات ءبىلدىرىپ، «وبلىس الدىندا سىڭىرگەن ەڭبەگى ءۇشىن» بەلگىسىن تابىستاعان بولاتىن. جالپى، پاۆلودار وبلىسىنىڭ بوكس تاريحىندا سەرىك تەمىرجانوۆ - الەم چەمپيوناتىنا قاتىسقان ەكىنشى سپورتشى. سوناۋ 1993 جىلى نيكولاي كۋلپين 91 كەلىدەن جوعارى سالماقتا جۇدىرىقتاسىپ، شيرەك فينالدا جەڭىلگەن ەدى. اراعا 28 جىل سالىپ سەرىك تەمىرجانوۆ وبلىسقا كۇمىس جۇلدە اكەلدى.