"پروكۋروردىڭ ءوتىنىشحاتى نەگىزىندە سوتتالۋشىنىڭ باسقا ەلدەرگە ودان ءارى كەتۋىنە جول بەرمەۋ جانە ونىڭ تۇرعان جەرىن انىقتاۋ ماقساتىندا سۋديا سوتتالۋشى س.كۇدەبايەۆقا حالىقارالىق ىزدەۋ جاريالادى، – دەدى سوت.
بۇگىنگى تاڭدا قىلمىستىق ءىس جۇرگىزۋ كودەكسىنىڭ 324-بابىنا سايكەس، ىزدەۋ جاريالانۋىنا بايلانىستى ءىس توقتاتىلدى.
بۇعان دەيىن ب ا ق كۇدەبايەۆتىڭ شەتەلگە قاشىپ كەتكەنىن حابارلاعان بولاتىن. ول قىرعىزستانمەن شەكارانى زاڭسىز كەسىپ ءوتىپ، ول جەردەن وزبەكستان ارقىلى سولتۇستىك كيپرگە نەمەسە تۇركياعا ۇشىپ كەتۋى مۇمكىن.
ەسكە سالايىق، ناۋرىز ايىنىڭ باسىندا سەرىك كۇدەبايەۆ اۋرۋحاناعا ءتۇسىپ، سوڭعى ءسوزىن ايتۋ ءۇشىن سوتقا كەلمەدى. كەيىن بۇل پروسەسس بىرنەشە رەت كەيىنگە شەگەرىلدى. ايتا كەتەيىك، پروكۋرورلار وعان "وكىلەتتىلىگىن اسىرا پايدالاندى" دەگەن ايىپپەن 9 جىل باس بوستاندىعىنان ايىرۋدى سۇراعان بولاتىن.