قىزىلوردا قالالىق قوعامدىق كەڭەس ءتوراعاسى سەرىك دۇيسەنبايەۆ قىركۇيەكتىڭ العاشقى كۇنىندە ەل پرەزيدەنتى قاسىم-جومارت توقايەۆتىڭ قازاقستان حالقىنا جولداعان جولداۋى ەلىمىزدىڭ بولاشاق دامۋى مەن ەرتەڭگى كۇنگە بەتبۇرىسىن ايقىنداپ بەرگەنىن ايتادى. بۇل تۋرالى Almaty-akshamy.kz Kyzylorda-news.kz-كە سىلتەمە جاساپ حابارلايدى.
«مەملەكەت باسشىسى قاسىم-جومارت كەمەل ۇلى توقايەۆ پارلامەنتتىڭ بىرلەسكەن وتىرىسىنا قاتىسىپ، قازاقستان حالقىنا جولداۋ جاسادى. بۇل جولداۋ ەلىمىزدىڭ بولاشاق دامۋى مەن ەرتەڭگى كۇنگە بەتبۇرىسىن ايقىنداپ بەردى. بارلىق باعىتتاردىڭ دامۋى، ەل تاعدىرى ءۇشىن اسا ماڭىزدى. قازاق حالقىنىڭ ءاربىر ازاماتىنىڭ كوكەيىندە جۇرگەن ماسەلەنى شەشۋ جولىنا ارنالعان جاڭا جولداۋ، ەل دامۋى مەن حالقىمىزدىڭ ومىرىندە ءبىرشاما جاڭاشىلدىقتىڭ بولاتىنىن كورسەتىپ بەرگەندەي.
قانداي زامان، قاي قوعام بولماسىن ءبىلىم الۋدى ەشقاشان شەتكە ىسىرىپ قويعان ەمەس. قازىرگى قوعام - ءبىلىمدى جاستاردىڭ قوعامى. باستى نازاردى جاسوسپىرىمدەردىڭ سپورت پەن شىعارماشىلىق تۇرعىدا ءبىلىم الۋىنا جاعداي جاساۋعا جۇمساۋدى تاپسىردى. سونىمەن قاتار پرەزيدەنتىمىز «جايلى مەكتەپ» ۇلتتىق جوباسىن جۇزەگە اسىرۋدى تاپسىرىپ، مەكتەپكە دەيىنگى ءبىلىم بەرەتىن ۇستازداردىڭ ەڭبەكاقىسىن كوتەرۋ قاجەتتىگىن اتاپ ءوتتى.
بۇل جولداۋدىڭ ءمان-ماڭىزى ايرىقشا. ونىڭ ارقالايتىن جۇگى ءبىر كۇن نەمەسە ءبىر جىلمەن شەكتەلمەيدى، اۋقىمى كەڭ، مازمۇنى دا بولەك. مەملەكەت باسشىسى الداعى ۋاقىتتا قازاقستان جاڭا رەفورمالى مەملەكەتكە اينالاتىنىن، پارلامەنت پەن ءماسليحاتتار جۇمىسى جۇيەلەنەتىنىن اتاپ ءوتتى. سونداي-اق، پرەزيدەنت سوت جۇيەسىن جاڭارتىپ، رەفورمالاۋ قاجەتتىگىن قاداپ ايتتى. جانە دە قۇقىق سالاسىندا ادال، ادىلەتتى ءارى جەمقورلىقتان ادا مامانداردى تارتىپ، حالىقتىڭ سەنىمىنە يە بولۋ تۇسىن باستى نازارعا الۋ كەرەكتىگىن تىلگە تيەك ەتتى.
قاسىم-جومارت توقايەۆتىڭ نەگىزگى ساياسي ۇستانىمدارىنىڭ ءبىرى – اشىقتىق جانە قوعاممەن تىعىز قارىم-قاتىناس ورناتۋ. ەل ازاماتتارىن، وتانىمىزدىڭ الدىندا ادال قىزمەت ەتۋگە، ابىرويلى ءىس جاساۋعا، تەرەڭ ءبىلىم الىپ، ەرىنبەي ەڭبەك ەتۋگە شاقىرادى. جولداۋدا ايقىندالعان باعىتتار ءوڭىرىمىزدىڭ ەكونوميكالىق ءوسىمىن جەدەلدەتىپ، حالىقتىڭ ءال-اۋقاتىن جاقسارتۋدا ماڭىزدى ءرول اتقاراتىنى ءسوزسىز. ەڭ باستىسى – ەلىمىزدىڭ ەگەمەندىگى. شىن مانىندە، ءبىز ءۇشىن قازاقستاننىڭ تاۋەلسىزدىگى بارىنەن قىمبات. سوندىقتان دا قوعامنىڭ الەۋمەتتىك بىرلىگىن نىعايتۋ ءۇشىن جىگەرىمىزدى جانىپ، زور ىنتامەن ىسكە كىرىسۋىمىز قاجەت.
ەندەشە ەلدىڭ ەرتەڭىنە الاڭداعان ەل پرەزيدەنتىنىڭ جاڭا باستامالارىنا قولداۋ ءبىلدىرىپ، جۇكتەگەن مىندەتتەرگە جاۋاپكەرشىلىكپەن قاراپ جانە ونىڭ ورىندالۋىنا ءبىز دە بىرلەسە اتسالىسايىق!
جاڭا قازاقستانعا، ادىلەتتى قازاقستانعا نىق قاداممەن اياق باسايىق!»، - دەيدى سەرىك دۇيسەنبايەۆ.