قازاقستان فۋتبول ۇلتتىق قۇراماسى 2026 جىلعى الەم چەمپيوناتى ىرىكتەۋىندە توپ كوشباسشىسى سولتۇستىك ماكەدونيامەن تەڭ ءتۇستى، - دەپ حابارلايدى aqshamnews.kz ءتىلشىسى.
ويىن 13-تەن 14 قازانعا قاراعان ءتۇنى سكوپەدە ءوتتى. بۇعان دەيىن قازاقستاندىقتار ليحتەنشتەيندى 4:0 ەسەبىمەن ۇتسا، الاڭ يەلەرى بەلگيامەن 0:0 ويناعان.
قۇرامالار:
- قازاقستان: سەيسەن (قاقپاشى)، ۆوروگوۆسكيي، ءالىپ، قاسىم، قايروۆ، قارامان، قۋات، زاينۋتدينوۆ، كەنجەبەك، سۆيريدوۆ، چەسنوكوۆ.
- سولتۇستىك ماكەدونيا: ديميترييەۆسكي (قاقپاشى)، ستويچيەۆسكي، ۆەلكوسكي، زايكوۆ، اليوسكي، يلييەۆسكي، اليمي، ميوۆسكي، باردي، ەلماس، ريستوۆسكي.
ويىن بارىسى:
قازاقستان العاشقى مينۋتتاردا جوعارى پرەسسينگپەن بىرنەشە ءقاۋىپتى ءسات جاسادى. 33-مينۋتتا سەيسەن جاقىن قاشىقتان سوققىلاردى ەكى رەت قايتاردى، وعان دەيىن جانكۇيەرلەر لازەرمەن كەدەرگى كەلتىردى.
54-مينۋتتا "جەڭىس" شابۋىلشىسى دىنمۇحامەد قارامان ايىپ الاڭىنداعى ابىر-سابىردا قايشىلاپ سوعىپ، ەسەپ اشتى - 0:1. 74-مينۋتتا الاڭ يەلەرىنىڭ كاپيتانى ەنيس باردي تاماشا ايىپپەن ەسەپتى تەڭەستىردى - 1:1. سوڭعى مينۋتتاردا شۋشەناچيەۆتىڭ ەكى مۇمكىندىگى گولعا اينالمادى، ال 94-مينۋتتا الىبەك قاسىم دوپتى قاقپا سىزىعىنان شىعارىپ، ەسەپتى تەڭ ساقتادى.
قورىتىندى ەسەپ - 1:1.
ايتا كەتەيىك، ماچ الدىندا ماكەدونيالىقتار 6 ويىننان كەيىن 12 ۇپايمەن توپتى باستاپ تۇرعان. Transfermarkt باعالاۋىنشا، سولتۇستىك ماكەدونيا قۇراماسىنىڭ قۇنى قازاقستاننان ەكى ەسەدەن اسا جوعارى (36 ملن ەۋرو vs 15 ملن ەۋرو). تەڭ ناتيجەدەن كەيىن ولار كوشباسشىلىقتى بەلگياعا بەردى. ال استانادا وتكەن العاشقى ويىندا قوناقتار 0:1 ەسەبىمەن ۇتقان ەدى.
ماچ الدى بلاگويا ميليەۆسكي قازاقستان قۇراماسىنىڭ "ساپالى كوماندا" ەكەنىن اتاپ وتكەن. زاينۋتدينوۆ سارى قاعاز الىپ، سوڭعى تۋردا بەلگياعا قارسى ويىندى وتكىزىپ الماق.