ءبىر مەكتەپتەگى وزگەرۋ تاريحى 2025 جىلدىڭ قاڭتارىندا شىعىس قازاقستان وبلىسىنىڭ گلۋبوكوۆ اۋدانىنا قاراستى ءىرى ورتا مەكتەپتەردىڭ بىرىندە ەرەكشە باستاما قولعا الىندى.
اۋداندىق پروكۋراتۋرا ءبىلىم ءبولىمى مەن مەكتەپ اكىمشىلىگىنىڭ بەلسەندى قولداۋىمەن ومىرلىك قيىندىققا تاپ بولعان جاسوسپىرىمدەردى ءوز قامقورلىعىنا الدى. وسىلايشا «كۇش-بىرلىكتە» دەپ اتالاتىن كوشباسشىلار كلۋبى دۇنيەگە كەلدى. ەڭ باستىسى — 7–8-سىنىپتىڭ 23 وقۋشىسىنا جاڭا تىنىس اشىلدى.
كۇدىكتەنىپ قاراعاننان گورى، سەنىم ارتتى. تۇزەتۋگە تىرىسقاننان گورى، قولداۋ كورسەتتى. ولاردى سپورتقا، شىعارماشىلىققا، بىرلەسكەن ىستەرگە جۇمىلدىردى.
ناتيجەسىندە ءۇش ايدىڭ ىشىندە ءتارتىپ بۇزۋشىلىقتىڭ ورنىنا – جەتىستىكتەر، نەمقۇرايدىلىقتىڭ ورنىنا – بەلسەندىلىك، تۇيىقتىقتىڭ ورنىنا – ساحنادا جارقىراعان ونەر كەلدى.
تاعى ءبىر ايرىقشا جايت – پروكۋروردىڭ قاتىسۋى رەسمي جيىندارمەن شەكتەلىپ قالماۋى. ول نەگىزگى جۇمىسىنان قولى بوساسا بولدى، مەكتەپكە بارىپ، بالالارمەن اڭگىمەلەستى، تەننيس جانە باسقا سپورت تۇرلەرىن بىرگە وينادى، ومىرلىك تاجىريبەسىمەن ءبولىستى.
بالعىن جۇرەكتەرگە ءدال وسىنداي قاراپايىم دا شىنايى ساتتەردىڭ اسەرى مول بولدى. ولار راسىمەن سەنىمگە يە ەكەنىن، جاندارىندا كومەك قولىن سوزۋعا دايار ەرەسەكتەر بار ەكەنىن ۇعىندى.
ال بۇل باستامانىڭ ءساتتى جۇزەگە اسۋىنا مەكتەپ ديرەكتورى مەن مۇعالىمدەردىڭ قوسقان ۇلەسى ولشەۋسىز. بالالار ءۇشىن قولايلى ورتا جاسالىپ، ءوزىن قاجەتتى، ەستىگەن، قابىلدانعان كۇيدە سەزىنۋىنە بار جاعداي جاسالدى.
وقۋشىلار ءوز كۇشتەرىمەن «ناۋرىز – مەيىرىم مەن بىرلىكتىڭ مەرەكەسى» اتتى مەكتەپتىك شارانى ۇيىمداستىرىپ، ءار جاسوسپىرىمگە قاجەتتى دۇنيەنىڭ ءبىر عانا مۇمكىندىك پەن وعان دەگەن سەنىم ەكەنىن دالەلدەدى.
جەكە ءوزىمنىڭ ويىم: ەرەسەكتەر شىنايى قامقورلىق كورسەتكەندە – تەك بالالار عانا وزگەرمەيدى، ءوزىمىز دە تۇبەگەيلى ترانسفورماسياعا ۇشىرايمىز. سەبەبى جۇرەگىمىزدەگى ىزگىلىككە، مەيىرىمگە دەگەن سەنىمىمىز جاڭعىرادى. «ماسەلەسى كوپ» دەپ جۇرگەن بۇل جەتكىنشەكتەر، شىن مانىندە، بىزدەن تەك تۇسىنىستىك پەن ىقىلاستى كۇتكەن ەكەن.
بۇگىنگى تاڭدا كلۋب مۇشەلەرى ءوز مەكتەبىنىڭ كوشباسشىلارىنا اينالدى. ال «كۇش - بىرلىكتە» باستاماسى الدىمەن اۋدان دەڭگەيىندە، كەيىن بۇكىل وڭىردە تاراتىلۋعا دايىندالىپ جاتىر.
بۇل تاجىريبە شىنىمەن شابىتتاندىرادى. مەنىڭ سەنىمىم: ەرتەڭگى قۋاتتى ۇرپاقتى تاربيەلەگىمىز كەلسە، ەڭ الدىمەن ولارعا قاجەتتىلىگىن سەزىندىرۋ كەرەك. قورقىتىپ ەمەس، قولداۋ ارقىلى.
بۇيىرىپ ەمەس، كوڭىل ءبولۋ ارقىلى. وسى جوبانىڭ جەتىستىگى ەسكەرىلىپ، مەن ونى باسقا وڭىرلەردە دە جۇزەگە اسىرۋدى تاپسىردىم. ول جاقتا دا پروكۋرورلار ناقتى مەكتەپتەرگە قامقورلىق جاساپ، ءار بالانىڭ بويىنداعى الەۋەتتى وياتۋعا اتسالىسادى.
زاڭ وكىلى رەتىندە ءبىز لايىقتى ۇرپاق قالىپتاستىرۋ – بارشامىزدىڭ ورتاق پارىزىمىز ەكەنىن جاقسى تۇسىنەمىز. سوندىقتان وسى جاۋاپكەرشىلىكتىڭ ءبىر بولىگىن ءوز موينىمىزعا الۋعا دايىنبىز. سەبەبى جاستاردى قولداۋ – تۇتاس ەلدىڭ بولاشاعىنا جاسالعان ەڭ ۇتىمدى ينۆەستيسيا.
قازاقستان پرەزيدەنتى قاسىم-جومارت توقايەۆتىڭ سوزىنە سۇيەنسەك: «جاستار – جارقىن بولاشاققا دەگەن بارلىق ءۇمىتىمىزدىڭ بەينەسى».
مىنە، وسىنداي جاڭاشا باستامالار ارتا تۇسسە ەكەن دەيمىز. ويتكەنى قۋاتتى مەملەكەت – ەڭ الدىمەن سەنىمگە يە، سىيلى جانە داۋسى ەستىلگەن جاس بۋىننان باستاۋ الادى.