سەناتتا اسكەري قىزمەتشىلەردىڭ دەنساۋلىعىنا قاتىستى ماسەلە تالقىلاندى

باس اسكەري پروكۋراتۋرا وكىلى 2020 جىلدان باستاپ ەلىمىزدە 270 اسكەري قىزمەتشى قايتىس بولعانىن جەتكىزدى.

بۇل تۋرالى باس اسكەري پروكۋروردىڭ ءبىرىنشى ورىنباسارى ماقسات قازييەۆ ءمالىم ەتتى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.

«2020 جىلى – 78، 2021 جىلى – 96، 2022 جىلى – 85، 2023 جىلى – 11 اسكەري قىزمەتشى قايتىس بولدى. ءولىم جاعدايلارىنىڭ ەڭ كوپ تاراعان سەبەپتەرىنە توقتالساق، اۋىرىپ قايتىس بولۋ – 36%، كولىك اپاتىنىڭ سالدارى – 24%، سۋيسيد – 20%. الايدا وز-وزىنە قول سالۋ جاعدايى ءبارىمىزدى الاڭداتىپ وتىر. سۋيسيد پروفيلاكتيكاسىن تالداۋ ناتيجەسى اسكەرىمىزدىڭ قوعامنىڭ ءبىر بولىگى رەتىندە جاعىمسىز جاعدايعا تاۋەكەلى بارىن كورسەتتى»، - دەدى م. قازييەۆ.

ونىڭ ايتۋىنشا،  حالىق اراسىنداعى سۋيسيد دەڭگەيى بويىنشا قازاقستان الەم ەلدەرى اراسىندا 20-ورىندا، ال جاسوسپىرىمدەر اراسىندا ءتىپتى ۇشتىككە ەنەدى.

«قۇقىقتىق ستاتيستيكا كوميتەتىنىڭ مالىمەتىنشە، 2018-2022 جىلدارى ەلدە 17 631 سۋيسيد جانە 21 332 وزىنە قول سالۋعا وقتالۋ جاعدايى تىركەلگەن، ياعني 10 000 ازاماتقا شاققاندا 9 سۋيسيد جانە 11 وز-وزىنە قول سالۋعا تالپىنۋ ارەكەتى تىركەلىپ وتىر. ولاردىڭ اراسىندا 86 سۋيسيد جانە وزىنە قول سالۋعا وقتالۋدىڭ 20 دەرەگى اسكەردە بولعان. ياعني 10 مىڭ اسكەري قىزمەتشىگە شاققاندا 6 سۋيسيد جانە 1 وز-وزىنە قول سالۋعا وقتالۋ ارەكەتىنەن كەلەدى. دەمەك، قوعامداعى وز-وزىنە قول سالۋ كوبىنەسە اسكەردە بولادى دەگەن پىكىر رەسمي مالىمەتتەرمەن راستالماي وتىر»، - دەدى باس اسكەري پروكۋروردىڭ ءبىرىنشى ورىنباسارى.