الماتى قالاسىندا قارجى، ۇلتتىق ەكونوميكا مينيسترلىكتەرى، ءماسليحاتتىڭ بەيىندى كوميسسياسى جانە الماتى قالاسى بويىنشا مەملەكەتتىك كىرىستەر دەپارتامەنتىنىڭ وكىلدەرىنىڭ، سونداي-اق «اتامەكەن» ۇكپ وڭىرلىك وكىلدەرىنىڭ قاتىسۋىمەن ق ر پارلامەنتى سەناتىنىڭ قارجى جانە بيۋدجەت كوميتەتى دەپۋتاتتارىنىڭ كوشپەلى وتىرىسى ءوتتى.
ءىس-شارا قازاقستان رەسپۋبليكاسى پرەزيدەنتىنىڭ 2023 جىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا سالىق سالۋ ماسەلەلەرى بويىنشا بەرگەن تاپسىرمالارىنىڭ ىسكە اسىرىلۋ بارىسىن تالقىلاۋ ماقساتىندا ۇيىمداستىرىلدى.
وتىرىستى ق ر پارلامەنتى سەناتىنىڭ قارجى جانە بيۋدجەت كوميتەتىنىڭ ءتوراعاسى س.ا. ماكەجانوۆ اشتى.
ۇلتتىق ەكونوميكا مينيسترلىگىنىڭ وكىلى ە. ساعنايەۆ سالىق ساياساتى بولىگىندە جاڭا سالىق كودەكسىنىڭ جوباسىنداعى نوۆەللالار تۋرالى ءسوز سويلەدى.
مەملەكەت باسشىسىنىڭ تاپسىرمالارىن ىسكە اسىرۋدىڭ نەگىزگى تاسىلدەرى تۋرالى قارجى ۆيسە-مينيسترى ە.ءبىرجانوۆ ەگجەي-تەگجەيلى ءتۇسىندىردى. وتىرىسقا قاتىسۋشىلاردىڭ تالقىلانۋىنا سالىقتىق اكىمشىلەندىرۋ ماسەلەلەرى شىعارىلدى.
سونىمەن قاتار، ەرجان ءبىرجانوۆ سالىقتىق اكىمشىلەندىرۋ كەزىندە سەرۆيستىك مودەلگە كوشۋ، سالىقتىق باقىلاۋدى تولىق سيفرلاندىرۋ، سالىقتىق ەسەپتىلىك نىساندارىن قىسقارتۋ جانە ققس قايتارۋ ءراسىمىن وڭايلاتۋ بيزنەس-ورتاعا وڭ اسەرىن تيگىزەتىنىن جانە كاسىپكەرلەرگە سالىق مىندەتتەمەلەرىن ورىنداۋ ءۇشىن ىڭعايلى نۇسقالاردى قولدانۋعا مۇمكىندىك بەرەتىنىن اتاپ ءوتتى.
مۇنداي وزگەرىستەر جاڭا IT-شەشىمدەردى قولدانۋ، ءموبيلدى قوسىمشالاردى پايدالانۋ، سونداي-اق جاساندى ينتەللەكت نەگىزىندە ەنگىزىلەتىن بولادى. سونداي-اق، وتىرىستا «اتامەكەن» ۇكپ، قاۋىمداستىقتار جانە وندىرىستىك سەكتور كاسىپكەرلەرىنىڭ وكىلدەرى ءوز ۇسىنىستارىن ءبىلدىردى.
كەزدەسۋ قورىتىندىسى بويىنشا قاتىسۋشىلار وسىنداي ءىس-شارالاردىڭ ماڭىزدىلىعى مەن پايدالىلىعىن اتاپ ءوتىپ، سالىق زاڭناماسىن جەتىلدىرۋ بويىنشا ودان ءارى نورماشىعارماشىلىق جۇمىستارعا دايىن ەكەندىكتەرىن ءبىلدىردى.