سوڭعى 5 جىلدا ءبىلىم سالاسىنداعى زاڭعا 29 رەت وزگەرىس ەندى.
سونىڭ ىشىندە ۇشتىلدىلىكتى وقىتۋ – ۇرپاقتىڭ ساناسىن ساۋلەلەندىرۋ ەمەس، كەرىسىنشە كەلەشەگىن كومەسكىلەۋ. بۇگىن سەناتورلار ءبىر كەزدەرى قابىلدانعان زاڭعا قايتا قارسى شىعىپ، شەت تىلدەرىن 5-سىنىپتان باستاپ وقىتۋعا ۇسىنىس جاسادى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
وندا دا اتا-انالارىنىڭ قالاۋىمەن جۇزەگە اسىرىلۋى كەرەك. جالپى، مۇنداي ويدى بۇعان دەيىن مەملەكەت باسشىسى ايتقان بولاتىن.
ال الەمدىك بانكتىڭ زەرتتەۋىنشە، قازاقستانداعى ادام كاپيتالى كورسەتكىشى 63 پايىز ەكەن. بۇل دەگەنىمىز 18 جاسقا دەيىنگى قالىپتاسۋى ءتيىس وقۋشىلاردىڭ قابىلەتتەرى مەن داعدىلارىنىڭ جيىنتىعى. دەمەك، ءبىلىم جۇيەسى سونىڭ 63 پايىزىن عانا بەرىپ وتىر. وسى تۇرعىدا وسكەلەڭ ورەن الدىمەن ءوز ءتىلى مەن دۇنيەتانىمىن بويعا ءسىڭىرىپ العانى ابزال.
"بالاباقشاداعى، 1-سىنىپتاعى ويلاۋ جۇيەسى ءالى تولىق جەتىلىپ قالىپتاسپاعان، ساناسى ۇلبىرەپ تۇرعان قازاق سابيلەرىنە بىردەن ءۇش ءتىلدى وقىتۋدىڭ قانداي قاجەتتىلىگى بار؟ عىلىمى مەن ءبىلىمى جوعارى جاپونيا، فينليانديا، فرانسيا، جۇڭگو 10 جاسقا دەيىن بالالارىن وزگە تىلدە نەگە وقىتپايدى؟ الەمنىڭ ەڭ مىقتى دەگەن 30 ەلىنىڭ باستاۋىش سىنىپتارىندا قانشا ءتىل وقىتىلاتىنىن زەرتتەپ قاراساق، 2 ءتىل ءبىرىنشى سىنىپتا 4-اق ەلدە، ەكىنشى سىنىپتا 5 ەلدە، ءتورتىنشى سىنىپتا 12 ەلدە وقىتىلاتىنىن كوردىك. ال قازاقستاننان باسقا الەمنىڭ بىردە-بىر مەملەكەتىندە 3 ءتىل مۇلدەم وقىتىلمايدى"، - دەدى ق ر پارلامەنتى سەناتىنىڭ دەپۋتاتى مۇرات باقتيار ۇلى.