بۋچاداعى جاعداي بويىنشا بۇۇ اياسىندا تەرگەۋ جۇرگىزۋ كەرەك – ماۋلەن اشىمبايەۆ
سەناتتىڭ جالپى وتىرىسىنان كەيىن تىلشىلەر پالاتا سپيكەرىنەن ۋكراينانىڭ بۋچا قالاسىنداعى وقيعاعا قاتىستى قازاقستاننىڭ ۇستانىمىن سۇرادى.
«ءبارىمىز بۇقارالىق اقپارات قۇرالدارىنان دا، الەۋمەتتىك جەلىلەردەن دە بۋچاداعى جانە باسقا دا ەلدى مەكەندەردە بولعان جاعدايدى كورىپ جاتىرمىز. بۋچاداعى جاعداي – ۇلكەن تراگەديا. ۋكراينا تاراپى گەنوسيد دەپ ايتىپ جاتقانىن ەستىپ جاتىرمىز. ال رەسەي تاراپى بۇنى ىستەمەگەنىن العا تارتۋدا. سول سەبەپتى حالىقارالىق ۇيىمداردىڭ اياسىندا، بۇۇ اۋقىمىندا كوميسسيا قۇرالادى دەگەن ويدامىن. سول كوميسسيا وبەكتيۆتى تۇردە جان-جاقتان اقپاراتتى جيناپ، ادامدارمەن كەزدەسىپ، سول جەرگە بارىپ، حالىقارالىق قاۋىمداستىققا مالىمەت بەرگەنى دۇرىس. بەيبىت ادامدار قازا بولدى. سوندىقتان بۇل جاعداي «قالاي بولدى، نەگە بولدى» دەگەن سۇراقتار اياسىندا حالىقارالىق ۇيىمداردىڭ قاتىسۋىمەن انىقتالۋ كەرەك»، - دەدى سەنات ءتوراعاسى.
وسى ورايدا م. اشىمبايەۆ بۇل وقيعاعا قاتىستى ەموسياعا سالىنباي، بۇۇ اياسىندا ۇلكەن تەرگەۋ جۇمىستارىن جۇرگىزگەن ورىندى بولاتىنىن اتاپ ءوتتى.
«مۇنداي ماسەلەلەرگە قاتىستى حالىقارالىق كونۆەنسيالار دا، حالىقارالىق شارتتار دا بار. بۇل تۇرعىدا بۇۇ اياسىندا ءتيىستى جۇمىستار ۇيىمداستىرىلعانى دۇرىس بولاتىنى ءسوزسىز. قازاقستاننىڭ رەسمي پوزيسياسىن سىرتقى ىستەر مينيسترلىگىنە سۇراۋ سالىپ، سولاردان العاندارىڭىز دۇرىس بولادى. جاقىندا پرەزيدەنتىمىز ءوز ماقالاسىندا ايتىپ كەتكەندەي، ءبىز ۋكراينانىڭ تەرريتوريالىق تۇتاستىعىن سىيلايمىز. بۇل جەردە پوزيسيامىز انىق. سوڭعى ايدا بۇل ماسەلەنى بىرنەشە رەت پرەزيدەنت تە، سىرتقى ىستەر ءمينيسترى دە ايتتى»، - دەدى سەنات ءتوراعاسى.
ايتا كەتەيىك، دۇيسەنبىدە ماسكەۋ بۋچاداعى جاعدايعا بايلانىستى بۇۇ قاۋىپسىزدىك كەڭەسىنىڭ وتىرىسىن شاقىرۋدى تالاپ ەتتى.