سەنات ءتوراعاسى ماۋلەن اشىمبايەۆ الماتى قالالىق ءماسليحاتىنىڭ دەپۋتاتتارىمەن كەزدەستى.
كەزدەسۋدە ەلىمىزدە جۇرگىزىلىپ جاتقان كەشەندى دەموكراتيالىق رەفورمالار جانە قازاقستاننىڭ ساياسي جۇيەسىندەگى جاڭعىرتۋلار جان-جاقتى تالقىلاندى، دەپ حابارلايدى Almaty-akshamy.kz Senate.parlam.kz-كە سىلتەمە جاساپ.
سەنات سپيكەرى ءوز سوزىندە ادىلەتتى قازاقستان قۇرۋدىڭ نەگىزگى قاعيداتتارىنا نازار اۋدارىپ، وسى باعىتتا بارلىق دەڭگەيدەگى وكىلدى ورگانداردىڭ بىرلەسكەن جۇمىسى ماڭىزدى ەكەنىن ايتتى.
سونداي-اق ماۋلەن اشىمبايەۆ الداعى پارلامەنت جانە ءماسليحاتتار سايلاۋىنا توقتالدى. سەنات ناعىز وڭىرلەردىڭ مۇددەسىن قورعايتىن پالاتاعا اينالادى. وسىعان قاتىستى وزگەرىستەر بويىنشا دا ءسوز قوزعالدى. سەنات ءتوراعاسى مۇنىڭ ءبارى مەملەكەت باسشىسى قاسىم-جومارت توقايەۆتىڭ باستاماسىمەن ىسكە اسىرىلعان كونستيتۋسيالىق رەفورمانىڭ لايىقتى جالعاسى ەكەنىن اتاپ ءوتتى.
«الداعى ۋاقىتتا پارلامەنت جاڭا جاعدايدا جانە جاڭا تالاپتار مەن مىندەتتەردى ەسكەرە وتىرىپ جۇمىس ىستەيدى. سەنات ناعىز وڭىرلەردىڭ مۇددەسىن قورعايتىن ورگانعا اينالۋى ءتيىس. ماڭىزدى ەكونوميكالىق جانە الەۋمەتتىك پروسەستەر كوبىنە جەرگىلىكتى جەرلەردە بولاتىنى بەلگىلى. وڭىرلەردى كەشەندى دامىتپاي تۇتاس ەلدىڭ وركەندەۋىن جاڭا دەڭگەيگە شىعارۋ مۇمكىن ەمەس. سوندىقتان ادىلەتتى قازاقستان قۇرۋ ءۇشىن، وسى باعىتقا باسىمدىق بەرۋىمىز كەرەك»، – دەدى ماۋلەن ساعاتحان ۇلى..
سونىمەن قاتار پالاتا ءتوراعاسى وسى اپتادا سەناتورلار قابىلداعان «اگلومەراسيالاردى دامىتۋ تۋرالى» زاڭ وڭىرلەردى جان-جاقتى دامىتۋدى كوزدەيتىنىن ايتتى. وسى زاڭ اياسىندا كەشەندى جوسپار قابىلدانادى. ودان بولەك، زاڭنىڭ نورمالارىن ىسكە اسىرۋ ازاماتتاردى قونىستاندىرۋ جانە وندىرىستىك كۇشتەردى ورنالاستىرۋ جۇيەسىن جەتىلدىرۋگە، ينجەنەرلىك، كولىكتىك جانە الەۋمەتتىك ينفراقۇرىلىمدى ءتيىمدى پايدالانۋعا وڭ اسەرىن تيگىزەدى. وسىعان وراي ماۋلەن اشىمبايەۆ ەلىمىزدەگى ەڭ ءىرى الماتى اگلومەراسياسىن دامىتۋ ءۇشىن سەنات پەن ءماسليحات دەپۋتاتتارى بىرلەسىپ جۇمىس ىستەۋى كەرەكتىگىن قاپەرگە الدى.
«وڭىرلەردە مەملەكەت باسشىسى بەرگەن تاپسىرمالاردىڭ، ۇلتتىق جوبالاردىڭ، شاعىن جانە ورتا بيزنەستى قولداۋ باعدارلامالارىنىڭ جانە باسقا دا ماڭىزدى باسىمدىقتاردىڭ ىسكە اسىرىلۋ بارىسىن باقىلاۋعا ەرەكشە نازار اۋدارىلادى. سەناتتىڭ نەگىزگى مىندەتتەرىنىڭ ءبىرى – وڭىرلەردىڭ مۇددەسىن قورعاۋ جانە وكىلدىك ەتۋ. ماسليحاتتارمەن تىعىز ءوزارا ءىس-قيمىل وسى باسىمدىقتىڭ نەگىزگى شارتى ەكەنى ءسوزسىز»، – دەدى ماۋلەن اشىمبايەۆ.
سەنات ءتوراعاسى الماتى قالاسىنداعى «الاتاۋ» الەۋمەتتىك قىزمەتتەر ورتالىعىنىڭ ۇجىمىمەن دە كەزدەستى. بۇل جەردە مۇگەدەكتىگى بار ازاماتتارعا ءتۇرلى باعىت بويىنشا الەۋمەتتىك جانە مەديسينالىق قىزمەتتەر كورسەتىلەدى.
ماۋلەن اشىمبايەۆ قازاقستاندىقتاردىڭ دەنساۋلىعىن جاقسارتۋ، مەديسينالىق قىزمەتتىڭ ساپاسىن ارتتىرۋ جانە دەنساۋلىق ساقتاۋدىڭ قولجەتىمدىلىگىن قامتاماسىز ەتۋ مەملەكەتتىڭ الەۋمەتتىك ساياساتىنىڭ ماڭىزدى باعىتى ەكەنىن ايتتى. سونداي-اق ول مەملەكەت باسشىسى قاسىم-جومارت توقايەۆ وسى سالاعا ۇنەمى باسا ءمان بەرىپ كەلە جاتقانىن تىلگە تيەك ەتتى.
سەنات ءتوراعاسى دەنساۋلىق ساقتاۋ سالاسىنا قاتىستى الداعى زاڭنامالىق جۇمىستارعا دا توقتالدى جانە ورتالىق ۇجىمىنا قامكوڭىل جاندارعا قامقورلىق كورسەتىپ، ەلىمىزدە وسى باعىتتىڭ جاندانۋىنا قوسقان ۇلەسى ءۇشىن العىس ءبىلدىردى.
«مەملەكەت باسشىسىنىڭ تاپسىرماسىمەن جىل سايىن مەديسينا قىزمەتكەرلەرىنىڭ جالاقىلارىن كوبەيتۋگە قاتىستى ناقتى شارالار قابىلدانىپ كەلەدى. كەلەر 2023 جىلدان باستاپ دارىگەرلەردىڭ جالاقىسى 30 پايىزعا، ورتا مەديسينالىق قىزمەتكەردىكى 20 پايىزعا وسەدى. الداعى كەزەڭدە دەنساۋلىق ساقتاۋعا بولىنەتىن قاراجاتتىڭ كولەمى ۇلعايا بەرەدى. 2027 جىلى ونىڭ كولەمى جالپى ىشكى ءونىمنىڭ كەمىندە 5 پايىزىنا جەتۋى ءتيىس. دارىگەر مارتەبەسى زاڭ جۇزىندە بەكىتىلەدى. وسىنداي ناقتى شارالار مەديسينا قىزمەتكەرلەرىن قورعاۋعا جانە قولداۋعا، كاسىپتىڭ بەدەلىن ارتتىرۋعا ىقپال ەتەدى دەپ سەنەمىز»، – دەدى ماۋلەن اشىمبايەۆ.