سەمىزدىكپەن كۇرەستىڭ تابيعي ءادىسى تابىلدى

بۇل جاڭالىق سەمىزدىكتى ءتيىمدى ءارى جەڭىلىرەك ەمدەۋگە كومەكتەسەدى. 

سان-فرانسيسكوداعى كاليفورنيا ۋنيۆەرسيتەتى عالىمدارى توڭكەرىسكە تەڭ جاڭالىق اشتى، دەپ حابارلايدى Almaty-akshamy مediatanym تەلەگرام ارناسىنا سىلتەمە جاساپ.

اق ماي جاسۋشالارىن قوڭىر تۇرىنە اينالدىرۋ ارقىلى سەمىزدىكپەن كۇرەسۋگە بولادى. اق ماي دەنەدە جينالادى، ال قوڭىر جاسۋشالى ماي كالوريانى جويىپ جىبەرەدى.

سەمىزدىك – دەنساۋلىق ساقتاۋ سالاسىنىڭ جاھاندىق پروبلەماسى، ول ديابەت، جۇرەك اۋرۋلارىمەن بايلانىسىپ جاتىر. ادامنىڭ قارىنىنا جينالاتىن اق ماي اعزادا ەنەرگيا جيناقتاۋدى بىلدىرگەنمەن، شامادان ارتسا ءقاۋىپتى.  

ال قوڭىر جاسۋشالار تەرموگەنەزگە قاتىسادى – جىلۋ شىعارىپ، دەنە تەمپەراتۋراسىن ۇستاپ تۇرادى. اقشىل ءتۇستى ماي جاسۋشالارى اعزانىڭ قاجەتتىلىگىنە قاراي ەنەرگيانى ساقتاۋعا ءارى جۇمساۋعا قاتىسادى.  

ادام اعزاسى اق ماي جاسۋشالارىن قوڭىر/اقشىل جاسۋشالارعا تابيعي تۇردە اينالدىرا الادى دەيدى عالىمدار. بۇل ءادىس كوپتەن بەرى زەرتتەلىپ كەلە جاتىر.

كاليفورنيا ۋنيۆەرسيتەتى عالىمدارى اق مايدى قوڭىر تۇستىگە اينالدىراتىن KLF-15 اقۋىزىن تاپتى. تىشقاندارعا جاسالعان سىناق ءساتتى ءوتتى. قوسىمشا زەرتتەۋلەر مەن كلينيكالىق سىناقتار جۇرگىزىلگەن سوڭ سەمىزدىككە ۇشىراعان ميلليونداعان ادامدى ەمدەۋدىڭ وزىق ءتاسىلى قولدانىسقا ەنگىزىلەدى.