بۇل جەردە زيرات بولۋى مۇمكىن ەمەس
قۇرىلىسشىلار تۇسىرگەن سۋرەت الەۋمەتتىك جەلىدە تەز تاراپ كەتكەن. ەكسكاۆاتور قۇرىلىس الاڭىن قازىپ جاتقاندا، توپىراق استىنان ادامنىڭ سۇيەگى تابىلعان، دەپ حابارلايدى Almaty-akshamy.kz Express Qazaqstan-عا سىلتەمە جاساپ.
سۋرەتكە قاراپ، سەمەيلىكتەردىڭ بىرەۋى بۇل توقسانىنشى جىلدارى قىلمىسكەرلەر ءولتىرىپ، كومىپ كەتكەن ادامنىڭ قاڭقاسى دەسە، باسقا بىرەۋلەرى بۇل جەردە زيرات بولعان دەگەن بولجام ايتىپ جاتىر.
«ەرتىس ماڭى» اتتى ولكەتانۋ قوعامداستىعىنىڭ جەتەكشىسى مارات ساسانوۆتىڭ ايتۋىنشا، سۇيەك تابىلعان قۇرىلىس الاڭى تۇرعىن ءۇي القاپتارىنا جاقىن ورنالاسقان. سوندىقتان، بۇل جەردە زيرات بولۋى مۇمكىن ەمەس.
«بۇل اۋداندا، ياعني، ەرتىس وزەنىن جاعالاي كەزىندە ەل قونىستانعان. بالكىم، بۇل زيراتقا ەمەس، ءۇيىنىڭ ماڭىنا جاقىن جەرلەنگەن ادامنىڭ سۇيەگى بولۋى مۇمكىن. سوندىقتان، انىقتاۋ كەرەك»،- دەيدى مارات ساسانوۆ.